کابل: (ویب ڈیسک) افغانستان میں طالبان کی حکومت آنے کے بعد جمعہ کے روز چوتھی بار دھماکا ہوا، اس دھماکے کے دوران تین نمازی شہید ہو گئے۔
غیر ملکی میڈیا کے مطابق افغان صوبے ننگرہار کے ضلع اسپین گھر کی مسجد اس وقت زور دار دھماکا ہوا جب وہاں نماز جمعہ ادا کی جا رہی تھی۔ دھماکے سے پورا علاقہ گونج اُٹھا۔
غیر ملکی میڈیا کے مطابق دھماکے میں 3 افراد شہید ہوگئے جبکہ امدادی کاموں کے دوران امام مسجد سمیت 15 افراد کو شدید زخمی حالت میں ہسپتال منتقل کیا گیا ہے ، زیادہ تر زخمیوں کی حالت نازک بتائی جا رہی ہے جبکہ ہلاکتوں میں اضافے کا خدشہ ہے۔
طالبان کمانڈر نے نام نہ ظاہر کرنے کی شرط پر مسجد میں دھماکے کی تصدیق کرتے ہوئے برطانوی خبر رساں ادارے رائٹرز کو بتایا کہ ہلاکتوں میں اضافے کا خدشہ ہے۔
تاحال کسی گروپ نے حملے کی ذمہ داری قبول نہیں کی ہے۔ طالبان کے اقتدار سنبھالنے کے بعد سے جمعہ کے روز مسجد میں دھماکے کا یہ چوتھا واقعہ ہے تاہم اس بار سنی مسجد کو نشانہ بنایا گیا ہے۔ اس سے قبل گزشتہ دھماکوں کی ذمہ داری داعش خراسان نے قبول کی تھی۔
یاد رہے کہ نومبر کے آغاز میں داعش کے بم دھماکے میں 20 افراد جاں بحق ہوئے تھے جبکہ پچاس سے زائد زخمی ہوئے تھے۔
