برازیلیا: (ویب ڈیسک ) برازیل کے صدر لولا ڈی سلوا نے آرمی چیف جنرل جولیو سیزر ڈی اروڈا کو برطرف کر دیا۔
غیر ملکی خبر ایجنسی کے مطابق برازیلین صدر لولا ڈی سلوا نے دارالحکومت برازیلیا میں دو ہفتوں کے احتجاج کے بعد ملک کے آرمی چیف جنرل جولیو سیزر ڈی اروڈا کو عہدے سے برطرف کر دیا۔
میڈیا رپورٹس کے مطابق آرمی چیف جنرل جولیو سیزر ڈی اروڈا نے 30 دسمبر کو اپنا عہدہ سنبھالا تھا۔
صدر لولا ڈی سلوا کے قریبی کمانڈر جنرل ٹومس ربیریو پیویا کو نیا آرمی چیف لگایا جا رہا ہے جو جنوب مشرقی ملٹری کمانڈ کے سربراہ رہ چکے ہیں، جنرل ٹومس نے مظاہرین سے پرامن رہنے کی اپیل کرتے ہوئے عوام کو صدارتی انتخابات کے نتائج کو تسلیم کرنے کا مشورہ دیا تھا۔
اس حوالے سے صدر لولا ڈی سلوا نے شک کا اظہار کرتےہوئے کہا ہے کہ آرمڈ فورسز کے اہلکار بھی مظاہرین کے ساتھ ملے ہوئے تھے۔
خیال رہے کہ برازیل کے صدر نے حالیہ دنوں فوج کے کئی افسران کو برطرف کیا ہے۔
یاد رہے کہ برازیل کے سابق صدر جیر بولسونارو کے ہزاروں حامیوں نے 8 جنوری کو دارالحکومت برازیلیا میں مظاہرہ کیا تھا ، ان مظاہروں میں درجنوں سکیورٹی اہلکار زخمی ہوئے اور مظاہرین نے صدارتی محل، کانگریس اور سپریم کورٹ کی عمارتوں کو بھی نقصان پہنچایا تھا۔
مشتعل افراد نے صدارتی انتخابات میں بولسونارو کی لولا سے ہار کو تسلیم نہ کرتے ہوئے فوج سے مداخلت کرنے کا مطالبہ کیا تھا۔
برازیل کے پولیس حکام کے مطابق 8 جنوری کو ہونے والے پر تشدد مظاہروں میں 2000 افراد کو حراست میں لیا گیا تھا۔
