بیروت: (دنیا نیوز) اسرائیل نے رات گئے بیروت ایئرپورٹ اور اس کے گردونواح میں بمباری کی، حملے میں حزب اللہ کے ممکنہ سربراہ کو نشانہ بنانے کا دعویٰ کیا۔
میڈیا رپورٹ کے مطابق اسرائیل نے جنوبی لبنان کے 20 گاؤں پر بھی بمباری کی، جس کے باعث بڑے پیمانے پر جانی نقصان کا خدشہ ہے، صیہونی فوج نے نباتیہ سمیت 70 گاؤں خالی کرنے کا حکم بھی دے دیا۔
اسرائیلی میڈیا کے مطابق رات گئے ہونے والے یہ حملے حسن نصراللہ پر کئے گئے حملے سے زیادہ بڑے تھے، جس کا ہدف ممکنہ طور پر حزب اللہ کے سربراہ ہاشم صفی الدین تھے۔
قطری ٹی وی نے بتایا کہ حملوں میں متعدد عمارتیں ملبے کا ڈھیر بن گئیں، واضح رہے کہ گزشتہ روز اسرائیلی حملوں میں 37 لبنانی شہری شہید اور151 زخمی ہوئے تھے۔
اسرائیلی حملوں کے باعث 12 لاکھ شہری نقل مکانی پر مجبور ہوگئے، 2ہزار افراد لقمہ اجل بن چکے ہیں، حزب اللہ نے جواب میں شمالی اسرائیل پر 100 راکٹ داغ دئیے، ساحلی علاقے نہاریہ میں آگ بھڑک اٹھی۔
حزب اللہ نے مارون الراس گاؤں میں جھڑپ کے دوران17 اسرائیلی فوجی جہنم واصل کرنے کا دعویٰ کیا ہے۔
