کارتالکیا: (ویب ڈیسک) ترکیہ کے ’سکی ریزورٹ ہوٹل‘ میں رات گئے آگ بھڑک اُٹھی جہاں 234 مہمان ٹھہرے ہوئے تھے۔
عالمی خبر رساں ادارے کے مطابق آگ ترکیہ کے صوبے بولو میں کے علاقے کارتالکیا کے 11 منزلہ ریزروٹ ہوٹل کی چوتھی منزل میں لگی۔
آگ لگنے سے گھبراہٹ کا شکار ہونے والے دو افراد نے چوتھی منزل سے چھلانگ لگا دی جس کے باعث دونوں موقع پر ہی ہلاک ہو گئے۔
فائر فائٹرز نے 4 گھنٹے کی مشقت کے بعد آگ پر قابو پا لیا، امدادی کاموں کے دوران 35 سے زائد بری طرح جھلسے ہوئے افراد کو ہسپتال منتقل کیا گیا۔
ریسکیو ادارے کے ترجمان نے بتایا کہ اس واقعے میں کم از کم 10 افراد ہلاک ہو گئے جبکہ 35 افراد ہسپتال میں زیر علاج ہیں۔
زخمیوں میں سے 6 کی حالت نازک ہونے کے باعث ہلاکتوں میں اضافے کا خدشہ ظاہر کیا جا رہا ہے، زیادہ تر ہلاکتیں دم گھٹنے کے باعث ہوئیں۔
تاحال آگ لگنے کی وجوہات کا تعین نہیں ہوسکا، حکومت کی جانب سے واقعے کی تحقیقات کے لیے انکوائری کمیٹی تشکیل دیدی گئی۔
