تل ابیب: (دنیا نیوز) اسرائیلی وزیراعظم بینجمن نیتن یاہو نے جنگ بندی مذاکرات کیلئےٹیم کو دوحہ جانے کا حکم دے دیا۔
غیر ملکی میڈیا رپورٹس کے مطابق اسرائیلی وزیراعظم نیتن یاہو نے کہا ہے کہ مزید قیدیوں کی رہائی کیلئے مذاکرات ضروری ہیں، تل ابیب دوحہ کے لیے پیشہ وارانہ سطح کے وفد کو بھیج رہا ہے تاکہ معاہدے پر مسلسل عمل درآمد سے متعلق تکنیکی تفصیلات پر تبادلۂ خیال کیا جائے۔
دوسری جانب سیکرٹری جنرل اقوام متحدہ نے غزہ میں مستقل سیز فائر کا مطالبہ کرتے ہوئے کہا ہے کہ مکمل جنگ بندی اور بغیرکسی تاخیر کے تمام یرغمالیوں کی رہائی ہونی چاہیے، ہم مزید قتل عام اور انسانی تباہی کی جانب نہیں جاسکتے، ایک خودمختار فلسطینی ریاست کا قیام ہی امن اور سلامتی کا ضامن ہے۔
ادھر فلسطینی مزاحمتی تنظیم حماس کے سیاسی بیورو باسم نعیم کا کہنا ہے کہ غزہ جنگ بندی معاہدے کی کامیابی کیلئے بھرپور کوششیں کر رہے ہیں، اسرائیل معاہدے کو نقصان پہنچانے کیلئے گیمز کھیل رہا ہے، اسرائیلی خلاف ورزیاں اور امداد کی فراہمی میں تاخیر معاہدے کو نقصان پہنچا رہی ہیں۔
انہوں نے مزید کہا کہ ہمارے ہاتھوں میں ابھی بھی بہت سے کارڈز ہیں کہ اسرائیل کو جواب دیں، دنیا بھر نے ٹرمپ کی تجویز کی مذمت کی جس پر عالمی براری کے مشکور ہیں، فلسطینی خود فیصلہ کریں گے کہ کہاں اور کیسے رہنا ہے۔
