ڈیلاس: (ویب ڈیسک) امریکی ریاست ٹیکساس میں سیلاب کے نتیجے میں ہلاک ہونے والوں کی تعداد 104 سے زیادہ ہو گئی ہے جبکہ 41 لاپتا افراد کی تلاش کا سلسلہ جاری ہے۔
خیال رہے کہ ریاست میں مزید بارش کی پیش گوئی کی گئی ہے، سیلاب کے نتیجے میں سب سے زیادہ ہلاکتیں کیئر کاؤنٹی میں ہوئیں جن کی تعداد 75 بتائی جاتی ہے۔
کاؤنٹی میں لڑکیوں کا مسٹک نامی سمر کیمپ متاثر ہوا جس میں طالبات اور عملے کے افراد سمیت 27 ہلاک ہوئے تاہم سیلاب کے وقت علاقے میں اور لوگ کیمپنگ کر رہے تھے، اس حوالے سے اب تک کچھ سامنے نہیں آیا۔
کیمپ انتظامیہ کی جانب سے بتایا گیا ہے کہ 10 لڑکیاں اور کیمپ کاؤنسلر اب بھی لاپتا ہیں۔
دوسری متاثرہ کاؤنٹیز میں ٹریوس کاؤنٹی، برنیٹ کاؤنٹی، ولیمسن کاؤنٹی، کنڈل کاؤنٹی اور ٹام گرین کاؤنٹی شامل ہیں، سرچ اینڈ ریسکیو آپریشن جاری ہے، ہلاک شدگان کی تعداد مسلسل بڑھ رہی ہے جبکہ بہت سی لاشوں کی شناخت ہونا ابھی باقی ہے۔
دوسری جانب وائٹ ہاؤس نے یہ تجاویز مسترد کر دی ہیں کہ قومی سطح پر موسم کی صورتحال کا الرٹ جاری کرنے والے این ڈبلیو ایس میں بجٹ کٹوتیاں ممکنہ طور پر آفت کی امداد میں رکاوٹ بن سکتی ہیں۔
واضح رہے کہ شدید موسم کے باعث امدادی ٹیموں کو مشکلات کا سامنا کرنا پڑ سکتا ہے، جو پہلے ہی کیچڑ اور ملبے سے گزرتے ہوئے زہریلے سانپوں کا سامنا کر رہے ہیں۔
ٹیکساس کے گورنر گریگ ایبٹ نے کہا تھا کہ حکام اس بات کو یقینی بنائیں گے کہ ہر لاپتا شخص کی تلاش کو یقینی بنایا جائے۔
