نیویارک: (ویب ڈیسک) خلیج تعاون کونسل نے مسئلہ فلسطین کے حل کیلئے سعودی کوششوں کی بھرپور حمایت کردی۔
عالمی میڈیا کی رپورٹ کے مطابق خلیج تعاون کونسل کے سیکرٹری جنرل جاسم محمد البدیوی نے کہا کہ کونسل کے وزرائے خارجہ کے رابطہ اجلاس نے دو ریاستی حل پر عمل درآمد کی غرض سے عالمی اتحاد کے قیام کے لئے سعودی عرب کے اقدام کی حمایت کی توثیق کی اور مسئلہ فلسطین کے حل کے لیے مشترکہ کوششوں پر تبادلہ خیال کیا ہے۔
خلیج تعاون کونسل کے وزرائے خارجہ نے فلسطینی علاقوں اور غزہ میں ہونے والی تازہ ترین پیش رفت کے ساتھ ساتھ بین الاقوامی کانفرنس کے دوران زیر بحث لائے گئے اہم موضوعات پر رابطہ کاری سمیت متعدد متعلقہ امور پر تبادلہ خیال کیا۔
سیکرٹری جنرل جاسم محمد البدیوی نے کہا کہ اجلاس میں غزہ کی پٹی میں انسانی صورتحا ل خاص طور پر غذائی اور طبی اشیاء کی قلت خاص طور سے توجہ مرکوز کی گئی، انہوں نے اس بحران کی وجہ اسرائیلی قابض افواج کی طرف سے مسلط کی گئی جاری مداخلت اور ناکہ بندی کو قرار دیا، جس میں شہری آبادی کے خلاف ایک پالیسی کے طور پر بھوک کا جنگی ہتھیار کے طور پر استعمال بھی شامل ہے۔
انہوں نے کہا کہ غزہ میں اسرائیلی اقدامات تمام بین الاقوامی قوانین، اقوام متحدہ کے کنونشنز اور انسانی اصولوں کی خلاف ورزی ہیں اور وہاں قحط کے پھیلاؤ میں اہم کردار ادا کررہے ہیں۔
ان کا کہنا تھا کہ غزہ کا محاصرہ ختم کرنے اور انسانی ہمدردی کی بنیاد پر امداد کی فوری اور غیر محدود ترسیل کو یقینی بنانے کے لئے ممالک، تنظیموں اور اداروں کے ساتھ مل کر علاقائی اور بین الاقوامی کوششوں کو تیز کرنے پر زور دیا۔
