نئی دہلی: (ویب ڈیسک) ایئر انڈیا نے دہلی سے واشنگٹن کے لئے اپنی پروازیں یکم ستمبر سے معطل کرنے کا اعلان کر دیا۔
عالمی میڈیا کے مطابق کمپنی نے یہ اعلان کرتے ہوئے بتایا کہ جہاز کم ہیں کیونکہ اُن کو اَپ گریڈ کئے جانے کا پہلے سے ہی منصوبہ تھا، ایئر انڈیا کے پاس موجود بوئنگ کے جہاز پرانے ہیں اور پاکستان کی جانب سے ایئر سپیس بند کئے جانے کے بعد کمپنی کو خسارے کا سامنا ہے۔
رپورٹ کے مطابق ایئر انڈیا کی پروازوں کے راستے پاکستانی فضائی حدود کی بندش کے باعث طویل ہو گئے ہیں اور آپریشنل پیچیدگی میں بھی اضافہ ہوا ہے، ایئرلائن نے اپنے بیڑے کو اپ گریڈ کرنے کے لئے 400 ملین ڈالر کا ریٹروٹ پروگرام شروع کیا ہے، تاہم پاکستان کی فضائی حدود کی پابندی کے باعث کمپنی کو خدشہ ہے کہ 12 ماہ کے دوران یہ لاگت 600 ملین ڈالر تک پہنچ سکتی ہے۔
ایئر انڈیا نے کہا کہ اس کے مسافروں کے پاس نیویارک، نیوآرک، شکاگو اور سان فرانسسکو میں ایئر لائن کے انٹر لائن پارٹنرز الاسکا ایئر لائنز، یونائیٹڈ ایئر لائنز اور ڈیلٹا ایئر لائنز کے ساتھ واشنگٹن ڈی سی کے لئے پروازوں کا انتخاب کرنے کے آپشنز ہوں گے۔
