واشنگٹن: (دنیا نیوز) امریکی صدر ڈونلڈ ٹرمپ روسی صدر ولادیمیر پیوٹن سے ملاقات کے لیے واشنگٹن سے الاسکا پہنچ گئے۔
برطانوی نشریاتی ادارے ’بی بی سی‘ کی رپورٹ کے مطابق امریکی صدر ڈونلڈ ٹرمپ اپنے خصوصی طیارے ایئر فورس ون کے ذریعے الاسکا پہنچ گئے ہیں جہاں وہ روسی صدر ولادیمیر پیوٹن سے ملاقات کریں گے۔
امریکی صدر کے قریبی ساتھیوں میں وزیر خارجہ مارکو روبیو، وائٹ ہاؤس کے خصوصی ایلچی اسٹیو وٹکوف اور سی آئی اے کے ڈائریکٹر جان ریٹکلف بھی شامل ہیں، جو روس۔یوکرین جنگ میں امن قائم کرنے کی کوشش میں ان کے ساتھ ہیں۔
توقع ہے کہ ڈونلڈ ٹرمپ مقامی وقت کے مطابق صبح 11:30 بجے (پاکستانی وقت کے مطابق رات 12:20 بجے) ایلمینڈورف-رچرڈسن بیس پر روسی صدر ولادیمیر پیوٹن سے ملاقات کریں گے۔
یہ بھی پڑھیں: امریکی حکومت میں 3 لاکھ نوکریاں ختم کرنے کی تیاری، ٹرمپ نے آگاہ کر دیا
ایک امریکی عہدیدار نے میڈیا کو بتایا کہ صدر ڈونلڈ ٹرمپ اور روسی صدر ولادیمیر پیوٹن کے درمیان سربراہی اجلاس میں تمام آپشنز میز پر موجود ہوں گے، جن میں یہ امکان بھی شامل ہے کہ اگر ٹرمپ کو محسوس ہوا کہ روسی صدر معاہدہ کرنے میں سنجیدہ نہیں تو وہ اجلاس سے واک آؤٹ کر دیں گے۔
قبل ازیں، امریکی صدر نے دوران سفر رپورٹر سے گفتگو کرتے ہوئے کہا کہ میں یہ سب کچھ اپنی صحت کے لیے نہیں کر رہا، مجھے اس کی ضرورت نہیں، میں چاہتا ہوں کہ اپنے ملک پر توجہ دوں لیکن میں یہ سب کئی جانیں بچانے کے لیے کر رہا ہوں۔
انہوں نے کہا کہ اگر ولادیمیر پیوٹن جنگ ختم کرنے پر رضامند نہ ہوئے تو روس کے لیے اس کے سخت نتائج ہوں گے، ممکنہ اقتصادی اقدامات کے بارے میں بات کرتے ہوئے ڈونلڈ ٹرمپ نے کہا کہ جی ہاں، یہ بہت سخت ہوں گے۔
