واشنگٹن: (دنیا نیوز) امریکا نے بھارتی مصنوعات پر 25 فیصد اضافی ٹیرف عائد کرنے کا نوٹیفکیشن جاری کردیا۔
امریکا کی جانب سے جاری کردہ نوٹیفکیشن کے مطابق اضافی ٹیرف کا اطلاق آج سے ہوگا، نوٹیفکیشن امریکی ہوم لینڈ سکیورٹی نے جاری کیا، بھارت پر عائد مجموعی ٹیرف 50 فیصد ہوگیا، اقدام یوکرین پر روسی حملوں میں بھارت کی بالواسطہ حمایت کے جواب میں اٹھایا گیا۔
واضح رہے کہ امریکی صدر ڈونلڈ ٹرمپ نے دھمکی دینے ہوئے کہا ہے کہ چین نے مقناطیس فراہم نہ کئے تو 200 فیصد ٹیرف عائد کردیں گے۔
یاد رہے کہ امریکی صدر ڈونلڈ ٹرمپ کا کہنا تھا کہ بھارت ہمارا دوست ہے لیکن ہم نے بھارت کے ساتھ کم کاروبار کیا کیونکہ ان کے محصولات بہت زیادہ ہیں، بھارت کے ٹیکس دنیا میں سب سے زیادہ محصولات میں سے ہیں۔
ڈونلڈ ٹرمپ نے یہ بھی کہا تھا کہ بھارت کی تجارتی رکاوٹیں بھی سخت ترین اور ناپسندیدہ ترین ہیں، بھارت نے ہمیشہ فوجی ساز و سامان کی بھاری مقدار روس سے خریدی ہے۔
ٹرمپ کا کہنا تھا کہ بھارت، چین کے علاوہ روسی توانائی کا سب سے بڑا خریدار ہے، پوری دنیا روس سے چاہتی ہے کہ وہ یوکرین میں قتل و غارت بند کرے ایسے وقت میں یہ سب اچھی باتیں نہیں۔
خیال رہے کہ امریکی صدر ڈونلڈ ٹرمپ نے اپریل میں 25 ممالک پر ٹیرف لگانے کا اعلان کیا تھا، امریکی صدر کا کہنا تھا کہ اگر کوئی ملک شکایت کرتا ہو، کوئی ملک چاہتا ہو کہ ٹیرف ریٹ صفر کردیا جائے تو پھر اسے اپنی مصنوعات امریکا میں تیار کرنا ہوں گی کیونکہ یہاں کوئی ٹیرف نہیں۔
