تیانجن: (دنیا نیوز) چین کے صدر شی جن پنگ نے کہا ہے کہ ایس سی او باہمی اعتماد اور مفاد کے اصولوں کے تحت آگے بڑھ رہی ہے۔
چین کے شہر تیانجن میں شنگھائی تعاون تنظیم (ایس سی او) کا سربراہ اجلاس جاری ہے۔
ایس سی او سربراہ اجلاس سے خطاب کرتے ہوئے چینی صدر شی جن پنگ کا کہنا تھا کہ وقت گزرنے کے ساتھ تنظیم تناور درخت بن چکی ہے، ایس سی او ملکوں کے درمیان مختلف شعبوں میں تعاون کی بہت گنجائش ہے، رکن ملکوں کو تجارت اور معیشت کے شعبوں میں دستیاب مواقع سے استفادہ کرنا ہوگا۔
انہوں نے کہا کہ چین کی شراکت داروں سے تجارت 2.3 ٹریلین ڈالر سے تجاوز کر گئی، چین ممبر ممالک کو 10 ارب یوآن کا قرض دے گا۔
چینی صدر شی جن پنگ نے ایس سی او ترقیاتی بینک کے قیام کی تجویز دیتے ہوئے کہا کہ مشترکہ خوشحال مستقبل کیلئے تجارتی اور مواصلاتی روابط بڑھانا ہوں گے، چین ایس سی او رکن ممالک کے ساتھ مل کر اس علاقائی سکیورٹی فورم کو نئی بلندیوں تک لے جائے گا۔
یاد رہے کہ شنگھائی تعاون تنظیم کے دو روزہ اجلاس میں بیس ممالک کے سربراہان شریک ہیں۔
اجلاس میں وزیرِاعظم شہباز شریف پاکستان کا نقطۂ نظر پیش کریں گے اور عالمی مسائل اجاگر کریں گے، وزیراعظم خطے میں تعاون اور استحکام کو فروغ دینے کیلئے ایس سی او کے کردار کو مضبوط بنانے سے متعلق تجاویز پیش کریں گے۔
