لندن: (ویب ڈیسک) برطانوی حکام نے غیر قانونی مہاجرین کیخلاف آپریشن کے نتیجے میں 51 مشتبہ افراد کو حراست میں لے کر تحقیقات شروع کر دیں۔
خبر ایجنسی کے مطابق برطانیہ میں غیر قانونی مہاجرین کی روک تھام اور چھوٹی کشتیوں پر انگلش چینل عبور کرنے کی روش کی حوصلہ شکنی کیلئے ایک خصوصی آپریشن شروع کیا گیا ہے، حالیہ گرفتاریاں اسی آپریشن کے تناظر میں ہیں، گرفتار ملزمان میں سمگلرز بھی شامل ہیں۔
برطانوی ذرائع ابلاغ کے مطابق ویلش کی بندرگاہ پر رواں سال اب تک 220 سے زائد امیگریشن کیسز سامنے آچکے ہیں جن میں سے177 افراد کو داخلے سے انکار کر کے ہٹایا گیا، ان میں 3 رومانیہ کے باشندے بھی شامل ہیں، ڈبلن سے آنے والے ایک رومانیہ کے شہری کو بھی جان بوجھ کر ملک بدری کے حکم کی خلاف ورزی کرنے پر حراست میں لیا گیا۔
غیر قانونی ہجرت کیلئے ڈبلن اور ہولی ہیڈ کے درمیان فیری کی بجائے چھوٹی کشتیوں کا استعمال عام ہے، ایسے گروہ زیادہ تر لوگوں کو برطانیہ میں داخل کرنے کی کوشش اسی راستے سے کرتے ہیں، ڈوور کے بعد دوسری مصروف ترین فیری پورٹ پر پابندیوں کے بعد مختلف ذرائع استعمال کرنے کی کوشش کی جاتی ہے۔
