لاہور: (ویب ڈیسک) پاکستان کی جانب سے بھارت کے دو طیارے گرائے جانے کی خبر کے بعد ایشائی اسٹاک مارکیٹس میں مندی کا رجحان پایا جا رہا ہے۔ عالمی سطح پر دو جوہری طاقتوں کے درمیان بڑھتی کشیدگی نے خدشات بڑھا دیے ہیں۔
نیوز ایجنسی اے ایف پی کی رپورٹ کے مطابق چین اور امریکا کے درمیان ہونے والی تجارتی ڈیل کے عالمی منڈیوں میں مثبت اثرات دیکھے جا رہے تھے تاہم تجارتی مراکز اس وقت بُری طرح لرز گئے جب پاکستان کی جانب سے یہ بیان سامنے آیا کہ پاکستانی فضائیہ نے بھارت کے دو طیاروں کو مار گرایا ہے اور ایک بھارتی پائلٹ کو گرفتار کر لیا ہے۔
بین الااقومی تجزیہ کاروں کے مطابق یہ ایک غیر یقینی صورتحال ہے۔ 1971ء کی جنگ کے بعد سے پاکستان اور بھارت کے درمیان یوں جوابی جنگی کارروائیاں نہیں کی گئی ہیں۔‘‘ یہ کہنا بہت مشکل ہے کہ آگے کیا ہوگا لیکن ایسا لگتا ہے کہ پاکستان نے بھارتی کارروائی کا جواب دے دیا ہے اور ہلاکتیں بھی ہوئی ہیں اور گرفتاریاں بھی۔
اے ایف پی کی رپورٹ کے مطابق اس خبر سے عالمی سٹاک مارکیٹوں میں یکدم ہلچل مچ گئی لیکن کچھ نقصانات کے بعد مارکیٹ کچھ حد تک واپس بحال ہوئی ہے۔ ممبئی کی اسٹاک مارکیٹ میں 0.4 فیصد جبکہ کراچی اسٹاک مارکیٹ میں تین فیصد کی گراوٹ دیکھنے میں آئی۔
