کراچی: (دنیا نیوز) سٹیٹ بینک آف پاکستان نے چھوٹے اور درمیانے درجے کے کاروبار کو بہتر فنانس فراہم کیلئے مسودے کو عوامی مشاورت کیلئے پیش کر دیا۔
سٹیٹ بینک کے اعلامیہ کے مطابق چھوٹے اور درمیانے درجے کی فنانسنگ کا 18 نقاط پر مفصل مسودہ مرتب کیا ہے، چھوٹے کاروبار کو 10 کروڑ اور درمیانے کاروبار کو 50 کروڑ کی حد تجویز کی گئی ہے۔
اعلامیہ کے مطابق ڈیجیٹل سپلائی چین فنانسنگ کے نفاذ کیلئے فن ٹیک کمپنیوں سے تعاون بڑھانے پر توجہ ہے، ایس ایم ایز قرضوں کی مانیٹرنگ کے ریئل ٹائم نظام کی تجویز بھی مسودے میں شامل ہے۔
سٹیٹ بینک کے مطابق ایس ایم ایز قرضوں کی منظوری یا مسترد کیئے جانے کیلئے 25 دنوں کی حتمی حد مقرر کی گئی ہے۔
اعلامیہ کے مطابق عوام الناس سٹیٹ بینک کی ویب سائٹ سے مسودے تک باآسانی رسائی حاصل کر سکتے ہیں۔
