ٹوکیو: (ویب ڈیسک) امریکی صدر ڈونلڈ ٹرمپ کی جانب سے عالمی سطح پر نئے تاریخی ٹیرف کے نفاذ کے بعد ایشیائی حصص بازاروں میں کاروبار کے آغاز پر شدید مندی دیکھی گئی۔
امریکی میڈیا کے مطابق ایشیا پیسیفک ریجن کی بڑی سٹاک مارکیٹوں میں سرمایہ کاروں کے اعتماد کو دھچکا لگا، جاپان، جنوبی کوریا اور تائیوان کے انڈیکس سرخ زون میں داخل ہو گئے ہیں۔
جاپان کے بنچ مارک نکئی 225 میں 0.6 فیصد کمی ہوئی ہے، جنوبی کوریا کا کوسپی انڈیکس 3.2 فیصد کی شدید گراوٹ کے ساتھ نیچے آ گیا، تائیوان کا ٹائیکس 0.4 فیصد کمی کے ساتھ بند ہوا البتہ ہانگ کانگ کی ہینگ سینگ انڈیکس میں معمولی 0.2 فیصد اضافہ ریکارڈ کیا گیا۔
تجزیہ کاروں کے مطابق امریکی اقدامات سے عالمی تجارتی ماحول مزید کشیدہ ہوتا جا رہا ہے، جس کے اثرات ایشیائی منڈیوں پر فوری ظاہر ہونا شروع ہو گئے ہیں، کاروباری حلقے اس صورتحال کو ٹیرف شاک قرار دے رہے ہیں، جو مستقبل قریب میں عالمی معیشت پر گہرے اثرات مرتب کر سکتا ہے۔
