پشاور: (دنیا نیوز) مشیر خزانہ خیبرپختونخوا مزمل اسلم نے کہا ہے کہ صرف ایک ماہ میں شہباز شریف کی حکومت نے 1830 ارب روپے کا قرضہ لیا۔
اپنے ایک بیان میں مشیر خزانہ کے پی مزمل اسلم کا کہنا تھا کہ کیسے ملک کی معیشت اچھی ہو رہی ہے؟ پاکستان کا مجموعی قرضہ 78،000 ارب روپے کے قریب پہنچ چکا ہے، سوا تین سال میں شہباز شریف کی حکومت اب تک 34،500 ارب روپے کا قرضہ لے چکی۔
انہوں نے کہا کہ جب شہباز شریف حکومت میں آئے تو ملک کا قرضہ 43500 ارب روپے تھا، شہباز شریف ملکی قرضہ کم کرنے آئے تھے مگر اب قرضہ لینے کی تاریخ رقم کر دی۔
ان کا کہنا تھا کہ شہباز شریف کی حکومت کے دوران ملک کے مجموعی قرضے میں 79 فیصد کا اضافہ ہوا، ملک چلانے کے لئے 75 سال میں جو قرضہ لیا گیا اب اس کا 80 فیصد 3 سالوں میں لیا گیا، 3 سالوں میں ملک میں ترقیاتی کاموں کی ایک اینٹ بھی نہیں لگی، حالت یہ ہے کہ سٹیٹ بینک مارکیٹ سے ڈالرز خرید رہا ہے۔
مشیر خزانہ خیبرپختونخوا نے مزید کہا کہ سرمایہ کاری تو چھوڑیں کوئی قرض بھی نہیں دے رہا۔
