اسلام آباد: (دنیا نیوز) وزیراعظم شہبازشریف کی ہدایت پر وزیرمملکت خزانہ و ریلوے بلال اظہر کیانی پاکستان کی نمائندگی کے لئے ابوظہبی روانہ ہو گئے۔
دنیا اور خطے کو جوڑنے کے عنوان سے عالمی ٹرانسپورٹ نمائش اور بین الاقوامی کانفرنس منگل سے متحدہ عرب امارات میں شروع ہوگی۔
2 اکتوبر تک جاری رہنے والی تین روزہ ’ گلوبل ٹرانسپورٹ انفراسٹرکچر نمائش اور کانفرنس‘ میں دنیا بھر سے ریل کے شعبے کے 20 ہزار سے زائد نمائندے شرکت کر رہے ہیں، ابوظہبی قومی نمائش مرکز میں منعقدہ سرگرمی میں 200 کمپنیاں حصہ لے رہی ہیں۔
100 ممالک سے کانفرنس میں 800 مندوبین شرکت کریں گے، 200 مقررین مختلف سیشنز میں خطاب کریں گے، وزیرمملکت خزانہ وریلوے بلال اظہر کیانی مستقبل کی ٹرانسپورٹ اور عالمی رابطوں کے عنوان پر خصوصی مہمان کے طور پر کلیدی خطاب کریں گے۔
وزیرمملکت بلال اظہر کیانی بین الاقوامی کانفرنس کے وزراتی پینل ڈسکشن میں بھی حصہ لیں گے، بلال اظہر کیانی یو اے ای کے ریلوے سٹیشن کا دورہ کرنے کے علاوہ تیز رفتار جدید ٹرین میں سفر بھی کریں گے۔
بین الاقوامی کانفرنس اور نمائش کا اہتمام یواے ای کے قومی ریل نیٹ ورک کی ترقی اور انتظام کے ذمہ دار ادارے اتحاد ریل نے کیا ہے، اتحاد ریل کے چئیرمین شیخ طیب بن محمد بن زاید آل نھیان کی دعوت پر وزیر مملکت بلال اظہر کیانی کانفرنس اور نمائش میں شرکت کر رہے ہیں۔
وزیرمملکت بلال اظہر کیانی کی دورے کے دوران یو اے ای کے وزیر انرجی اور انفراسٹرکچر سہیل محمد فرج المزروعی سے دوطرفہ ملاقات ہو گی، اتحاد ریل کے سی ای او انجینئر شادی ملک سے بھی وزیر مملکت بلال اظہر کیانی کی دوطرفہ ملاقات ہوگی۔
بین الاقوامی کانفرنس کے پہلے دن تیز رفتار ریل، اے آئی اور ڈیٹا، ڈیجیٹل ایسٹ لائف سائیکل مینجمنٹ، آپریشنل استعداد کار میں اضافے موضوعات پر بات ہوگی۔
کانفرنس کے دوسرے اور تیسرے دن سائبر سکیورٹی، اربن پلاننگ، مسافروں کو بہترین سفری سہولیات کی فراہمی سمیت دیگر اہم موضوعات زیر غور آئیں گے۔
