لاہور: (ویب ڈیسک) پاکستان کرکٹ بورڈ (پی سی بی) کو ٹی 10 کیلئے کھلاڑیوں کو این اوسی جاری کرنے پر 6 لاکھ ڈالر ملیں گے۔
ذرائع کے مطابق پی سی بی کو اس کے بدلے 6لاکھ ڈالر حاصل ہوں گے، مجموعی طور پر 17پاکستانی کرکٹرز دوسرے ایڈیشن کیلیے مختلف ٹیموں میں شامل ہیں،ٹی 10 لیگ میں شرکت کیلیے پاکستانی کرکٹرز کو اجازت دینے کے معاملے میں پی سی بی نے انتہائی محتاط رویہ اختیار کررکھا تھا، بالآخر آئی سی سی اور امارات کرکٹ بورڈ سے حاصل شدہ معلومات اور چھان بین کے بعد این اوسی جاری کرنے کا فیصلہ کرلیا گیا۔
ذرائع کے مطابق پی سی بی کو اس کے بدلے 6لاکھ ڈالر حاصل ہوں گے، مجموعی طور پر 17پاکستانی کرکٹرز دوسرے ایڈیشن کیلیے مختلف ٹیموں میں شامل ہیں، آئیکون پلیئرز شاہد آفریدی اور شعیب ملک کے ساتھ محمد حفیظ، آصف علی، وہاب ریاض، سہیل تنویر، جنید خان، شان مسعود، سہیل خان ، عمراکمل، محمدسمیع اور دیگر کے نام فہرست میں موجود ہیں، یہ سب 104 انٹرنیشنل کھلاڑیوں کے پول کا حصہ ہیں۔ ٹی 10 لیگ کے دوران ہی پاکستان اور نیوزی لینڈ کی ٹیسٹ سیریز یواے ای میں جاری ہو گی، اس میں شامل کھلاڑیوں کو شرکت کا موقع نہیں ملے گا۔
دریں اثناء دبئی میں پریس کانفرنس کے دوران ٹی 10 لیگ کے بھارتی چیئرمین شجیع الملک نے پی سی بی کے فیصلے کا خیرمقدم کیا ہے، انھوں نے کہا کہ ایونٹ میں شرکت پاکستان کے ساتھ دیگر ممالک کیلیے بھی حوصلہ افزا ہو گی، اس سے فارمیٹ کی مقبولیت میں اضافہ ہوگا، اب تمام کرکٹ کھیلنے والے ممالک کے سٹارز شارجہ سٹیڈیم میں دنیا بھر کے شائقین کرکٹ کی توجہ کا مرکز بنیں گے۔
یاد رہے کہ ٹی ٹین لیگ کے دوسرے ایڈیشن کا آغاز 21 نومبر سے ہوگا، 12 روزہ ایونٹ میں 29 میچز کھیلے جائیں گے۔
