مانچسٹر: (ویب ڈیسک) انگلینڈ کی ٹیم کو 219 رنز پر آؤٹ کرنے کے بعد دوسری اننگز میں قومی ٹیم نے 8 وکٹوں کے نقصان پر 137 رنز بنا لیے ہیں اور 244 سکور کی برتری حاصل کر لی ہے۔
تفصیلات کے مطابق مانچسٹر میں پاکستان اور انگلینڈ کی ٹیموں کے کھیلے جانے والے میچ میں گرین شرٹس نے پہلے کھیلتے ہوئے 326 رنز بنائے تھے، شان مسعود نے شاندار تھری فیگر اننگز کھیلی اور انگلینڈ میں کسی بھی پاکستانی اوپنر نے 24 سال بعد سنچری بنائی تھی۔ بابر اعظم نے بھی 69 سکور کی اننگز کھیلی تھی۔
انگلینڈ کی طرف سے پہلی اننگز کا آغاز اچھا نہ تھا۔ دوسرے روز کے دوران جوئے روٹ الیون ابتدائی وار سہنے کے بعد 4 وکٹوں پر 70 رنز بنائے تھے۔
آج ٹیسٹ کے تیسرے روز کے دوران انگلینڈ نے اپنی اننگز شروع کی تو قومی ٹیم کے باؤلرز نے حریف بیٹسمینوں کی ایک نہ چلنے دی۔ پوری ٹیم 219 رنز پر ڈھیر ہو گئی۔ اولی پوپ 62 رنز بنا کر نمایاں رہے۔ بٹلر نے 38 سکور کی باری کھیلی۔ دیگر کھلاڑی قابل کارکردگی دکھا نہ سکے۔
قومی ٹیم کی طرف سے سپنریاسر شاہ نے 4 وکٹیں حاصل کیں جبکہ محمد عباس اورشاداب خان کے حصے میں2.2 وکٹیں آئیں۔ شاہین آفریدی، نسیم شاہ نے بھی ایک ایک شکار کیے۔
میچ کی دوسری اننگز میں پاکستان کا آغاز اچھا نہ تھا۔ پہلی اننگز میں سنچری داغنے شان مسعود اس بار ناکام رہے، 6 کے مجموعی سکور پر براڈ کی گیند پر کریز چھوڑنے پر مجبورہوئے، عابد علی دوسری باری میں بھی ناکام رہے، 20 رنز بنا کر بیس کا نشانہ بن گئے۔
کپتان اظہر 18 رنز تک محدود رہے، بابر اعظم 5، اسد شفیق 29 ، شاداب خان 15، شاہین آفریدی 2 سکور بنا سکے۔یاسر شاہ 12 جبکہ محمد عباس صفر پر کریز پر موجود ہیں۔ قومی ٹیم نے 8 وکٹوں کے نقصان پر 137 رنز بنا لیے ہیں اور 244 رنز کی برتری حاصل کر لی ہے۔
میچ کے لیے دونوں ٹیمیں ان کھلاڑیوں پر مشتمل ہیں۔
پاکستان: اظہر علی(کپتان)، شان مسعود، عابد علی، اسد شفیق، بابر اعظم، محمد رضوان، شاداب خان، یاسر شاہ، محمد عباس، شاہین شاہ آفریدی اور نسیم شاہ۔
انگلینڈ: جو روٹ(کپتان)، ڈوم سبلی، رورے برنز، بین اسٹوکس، اولی پوپ، جوز بٹلر، کرس ووکس، ڈوم بیس، سٹورٹ براڈ، جوفرا آرچر اور جیمز اینڈرسن۔
