ہانگ کانگ کیخلاف بیٹنگ ، وسیم اکرم کی محمد رضوان پر شدید تنقید

Published On 03 September,2022 04:22 pm

لاہور: (ویب ڈیسک) قومی ٹیم کے سابق کپتان اور لیجنڈ فاسٹ باؤلر وسیم اکرم نے ہانگ کانگ کیخلاف سست بیٹنگ پر محمد رضوان کو تنقید کا نشانہ بنا ڈالا۔

سوشل میڈیا پر وائرل ہونے والی ویڈیو میں دیکھا جا سکتا ہے کہ ایشیا کپ ٹی 20 ٹورنامنٹ میں پاکستان اورہانگ کانگ میچ کے بعد سابق ٹیسٹ کرکٹر وسیم اکرم نے محمد رضوان کو تنقید کا نشانہ بنایا ہے۔

میچ کے بعد تبصرے میں سابق کپتان نے وکٹ کیپر پر شدید تنقید کرتے ہوئے کہا کہ محمد رضوان کا ناٹ آؤٹ جانا مجھے درست نہیں لگا۔ اگر آپ تھکے ہوئے ہیں تو باؤنڈریز لگانے کی کوشش کریں یا آؤٹ ہوجائیں۔

ان کا کہنا تھا کہ میرے خیال میں پاکستان کی بیٹنگ آٹھویں، نویں نمبرتک ہے۔ لائن اپ میں آصف، افتخار،نواز اور شاداب موجود تھے۔

وسیم اکرم نے مزید کہا کہ اسی وجہ سے کہہ رہا ہوں میرے نزدیک محمد رضوان کی 57 بالز پر 78 رنز ناٹ آؤٹ اننگز کا کوئی مطلب نہیں۔