لاہور : ( ویب ڈیسک ) نیوزی لینڈ ٹیسٹ ٹیم کے سابق کپتان کین ولیمسن نے کہا ہے کہ پاکستان میں ٹیسٹ کرکٹ کھیل کر بہت اچھا لگا، دوسرے ٹیسٹ کیلئے کنڈیشنز کے مطابق پلاننگ کریں گے۔
نجی ٹی وی کو دیئے گئے ایک انٹرویو میں کیوی کھلاڑی کین ولیمسن کا کہنا تھا کہ پاکستان میں ٹیسٹ کرکٹ کھیل کر کافی اچھا لگا، پہلا میچ بہت زبردست ہوا، ہم نتیجہ حاصل کر سکتے تھے۔
ولیمسن نے کہا کہ پاکستان کے پاس فاسٹ باؤلنگ کا ٹیلنٹ کافی زیادہ ہے، جب سے کرکٹ کھیل رہا ہوں پاکستان سے حیران کُن ٹیلنٹ آتا دیکھا ہے۔
سابق کیوی کپتان نے کہا کہ دوسرے ٹیسٹ کے لیے کنڈیشنز کے مطابق پلاننگ کریں گے، ہر جگہ مختلف کنڈیشنز کا ملنا ٹیسٹ کرکٹ کو چیلنجنگ بناتا ہے، پاکستان جیسی ٹیم کے خلاف بھرپور پلاننگ کے ساتھ کھیلنا ضروری ہے، اگر اہم کھلاڑی ان فٹ بھی ہوں تو پاکستانی ٹیم کمزور نہیں ہوتی۔
انہوں نے مزید کہا کہ آج کل کی بڑھتی ہوئی کرکٹ میں تینوں فارمیٹ کے لیے تیار رہنا چیلنج ہے، ہر ٹیم کے خلاف بڑا سکور کرنے کی کوشش کرتا ہوں، ہر ٹیم اپنی سٹرینتھ کے حساب سے حکمتِ عملی اپناتی ہے۔
