لندن : ( ویب ڈیسک ) انگلینڈ کرکٹ ٹیم کے آل راؤنڈر جوئے روٹ کا کہنا ہے کہ وہ آسٹریلیا کے خلاف ایشز سیریز کے دوسرے ٹیسٹ میں ضرورت پڑنے پر مزید باؤلنگ کرنے کے لیے تیار ہیں۔
روٹ نے ایجبسٹن میں کھیلے گئے آسٹریلیا کیخلاف ایشز سیریز کے پہلے ٹیسٹ میچ کی دوسری اننگ میں 15 اوورز کرائے تھے۔
انگلش آل راؤنڈر کا کہنا تھا کہ یہ بہت اچھا ہوتا ہے جب آپ کو اپنا حصہ ڈالنے کا موقع ملتا ہے اور میں ٹیسٹ وکٹیں لینے کے موقع کے لیے ہمیشہ تیار ہوں۔
روٹ انگلینڈ کی جانب سے 11,000 سے زیادہ ٹیسٹ رنز بنانے والے دو کھلاڑیوں میں سے ایک ہیں اور انہوں نے اپنے باؤلنگ کیرئیر کے دوران 55 وکٹیں بھی حاصل کی ہیں۔
انگلش ٹیم کے آل راؤنڈر معین علی انگلی کی انجری کا شکار ہیں جس پر کوچ برینڈن میک کولم نے کہا ہے کہ معین فٹ ہونے کی صورت میں دوسرے ٹیسٹ میں کھیلیں گے اور اگر وہ فٹ نہیں ہوئے تو انگلینڈ ول جیکس، ریحان احمد یا لیام ڈاسن پر غور کر سکتا ہے جبکہ دوسرا آپشن یہ ہوگا کہ معین کو ٹیم میں ایک اضافی سیمر کے ساتھ تبدیل کیا جائے اور روٹ کو باؤلنگ کی مزید ذمہ داری دی جائے۔
سابق کپتان روٹ نے اس حوالے سے کہا کہ معین بالکل ٹھیک ہو جائے گا، مجھے یقین ہے کہ وہ ٹھیک ہوں گے۔
علاوہ ازیں روٹ کا خیال ہے کہ ایجبسٹن میں انگلینڈ کی کارکردگی نے باقی سیریز کے لیے آسٹریلیا کو ایک مضبوط پیغام بھیجا ہے۔
خیال رہے کہ 32 سالہ جوئے روٹ نے گزشتہ تین ایشز سیریز میں انگلینڈ کرکٹ ٹیم کی قیادت بھی کر رکھی ہے۔
