کولمبو: (ویب ڈیسک) بنگلا دیش کرکٹ ٹیم کے ٹیسٹ کپتان نجم الحسن شانتو نے سری لنکا کے خلاف ٹیسٹ سیریز میں شکست کے بعد ٹیسٹ فارمیٹ کی قیادت چھوڑنے کا اعلان کردیا۔
نجم الحسن شانتو نے یہ اعلان میچ کے بعد پریس کانفرنس میں کیا جہاں بنگلا دیش کو اننگز اور 78 رنز سے شکست کا سامنا کرنا پڑا۔
اس موقع پر بنگلا دیش کی ٹیم کے کپتان نجم الحسن شانتو نے کہا ہے کہ میں ٹیسٹ فارمیٹ میں مزید کپتانی جاری نہیں رکھنا چاہتا، یہ کوئی ذاتی فیصلہ نہیں بلکہ ٹیم کے مفاد میں ہے۔
انہوں نے کہا ہے کہ تین الگ الگ فارمیٹس میں تین کپتان رکھنا ٹیم کے لیے سودمند نہیں ہو گا، میں کچھ عرصے سے ڈریسنگ روم کا حصہ ہوں اور سمجھتا ہوں کہ تین فارمیٹس میں تین کپتان رکھنا سمجھداری نہیں، یہ فیصلہ میں نے کچھ دن پہلے بورڈ کو بتا دیا تھا۔
انہوں نے واضح کیا کہ ان کے فیصلے کے پیچھے کوئی جذباتی ردعمل یا ذاتی مایوسی نہیں، میں چاہتا ہوں کہ لوگ اسے جذباتی فیصلہ نہ سمجھیں، یہ مکمل طور پر ٹیم کے فائدے کے لیے کیا گیا ہے۔
یاد رہے کہ نجم الحسن شانتو نے نومبر 2023 میں نیوزی لینڈ کے خلاف ہوم سیریز سے بنگلا دیش کی ٹیسٹ قیادت سنبھالی تھی، ان کی قیادت میں ٹیم نے 14 ٹیسٹ میچز کھیلے جن میں سے 4 میں کامیابی حاصل کی، 9 میں شکست ہوئی جبکہ ایک میچ ڈرا ہوا۔
ان کی کپتانی میں یادگار کامیابیاں اگست 2024 میں پاکستان کے خلاف دو مسلسل ٹیسٹ جیت کر حاصل کی گئیں، بیٹنگ کے میدان میں بھی شانتو کا ریکارڈ بہتر رہا، بطور کپتان ان کا بیٹنگ اوسط 36.24 رہا جبکہ بغیر کپتانی کے یہ اوسط 29.83 ہے، وہ ٹیسٹ میچز جن میں بنگلا دیش نے فتح حاصل کی ان میں نجم الحسن شانتو نے 37.16 کی اوسط سے رنز بنائے۔
یاد رہے کہ رواں ماہ کے آغاز میں نجم الحسن شانتو کو بنگلادیشی کرکٹ بورڈ کی جانب سے ون ڈے ٹیم کی قیادت سے ہٹا کر ان کی جگہ مہدی حسن کو کپتان مقرر کیا گیا تھا۔
