دبئی: (دنیا نیوز) آئی سی سی نے ٹیسٹ اور ون ڈے کی نئی پلیئر رینکنگ جاری کردی جس میں بیٹنگ، بولنگ اور آل راؤنڈر کیٹیگریز میں کئی بڑی تبدیلیاں سامنے آئی ہیں۔
ایجبسٹن ٹیسٹ میں 158 رنز کی شاندار اننگز کھیلنے والے انگلش بیٹر ہیری بروک نے ٹیسٹ کرکٹ میں دنیا کے نمبر ون بیٹر کا اعزاز جو روٹ سے چھین لیا، تازہ رینکنگ میں بروک 18 پوائنٹس کے فرق سے سرفہرست آ گئے ہیں جب کہ جو روٹ دوسرے نمبر پر چلے گئے ہیں۔
بھارتی کپتان شبمن گل نے ایجبسٹن ٹیسٹ میں 269 اور 161 رنز کی دو شان دار اننگز کھیل کر کیریئر کی بہترین چھٹی پوزیشن حاصل کر لی، کین ولیمسن (تیسرے)، یشسوی جیسوال (چوتھے) اور اسٹیو اسمتھ (پانچویں) ہیں۔
دوسری جانب آئی سی سی ون ڈے بلے بازوں کی رینکنگ میں شبمن گل پہلی، بابراعظم دوسری، روہت شرما تیسری، ویرات کوہلی چوتھی، نیوزی لینڈ کے ڈیرل مچل پانچویں پوزیشن پر برقرار ہیں۔
کپتان چارِتھ اسالنکا دو درجے بہتری کے ساتھ چھٹے نمبر پر آ گئے ہیں جبکہ کوشال مینڈس نے 10 درجے ترقی کے ساتھ 10ویں پوزیشن حاصل کرلی۔
بھارتی فاسٹ بولر جسپریت بمراہ نے آرام کے باوجود ٹیسٹ بولرز میں پہلی پوزیشن برقرار رکھی۔
