کنگسٹن: (دنیا نیوز) آسٹریلیا نے فاسٹ باؤلر مچل سٹارک کی تباہ کن اور ریکارڈ ساز سپیل کی بدولت میزبان ویسٹ انڈیز کو تیسرے ٹیسٹ میں 176 رنز سے شکست دے کر کلین سویپ کیا۔
آسٹریلیا اور ویسٹ انڈیز کے درمیان 3 ٹیسٹ میچز کی سیریز کا آخری میچ کنگسٹن میں کھیلا گیا جہاں میچ کے تیسرے روز میزبان ٹیم کو میچ جیتنے کیلئے 204 رنز کی ضرورت تھی۔
ایسے میں آسٹریلوی فاسٹ بولر مچل سٹارک نے اپنے کیریئر کا بہترین سپیل ڈال کر ٹیسٹ کرکٹ کا 78 سال پرانا ریکارڈ توڑ دیا اور اپنی ٹیم کو میچ میں فتح دلوادی۔
سٹارک کا ریکارڈ ساز سپیل
ویسٹ انڈیز کے خلاف 204 رنز کا دفاع کرتے ہوئے مچل سٹارک نے تباہ کن بولنگ کی اور ٹیسٹ کرکٹ کی تاریخ کی تیز ترین 5 وکٹیں مکمل کیں۔
سٹارک نے اپنے سپیل کی صرف 15 گیندوں میں 5 کھلاڑیوں کو پویلین کی راہ دکھائی اور ٹیسٹ کرکٹ میں کم سے کم گیندوں پر 5 وکٹیں مکمل کرنے کا 78 سال پرانا ریکارڈ توڑا۔
اس سے قبل 1947 میں آسٹریلیا کے ایرنی توشاک(Ernie Toshack) نے بھارت کے خلاف اپنے سپیل کی 19 گیندوں پر 5 وکٹیں لی تھیں۔
ویسٹ انڈیز کے خلاف 204 رنز کے ہدف کا دفاع کرتے ہوئے سٹارک نے مجموعی طور پر 9 رنز دے کر 6 وکٹیں حاصل کیں۔
اس کے علاوہ مچل سٹارک نے ٹیسٹ کرکٹ میں 400 وکٹیں بھی مکمل کرلیں، انہوں نے یہ کارنامہ اپنے 100 ویں ٹیسٹ میں سرانجام دیا، وہ یہ سنگ میل عبور کرنے والے چوتھے آسٹریلوی بولر ہیں۔
ویسٹ انڈیز تاریخ کے دوسرے کم ترین سکور پر آؤٹ
میزبان ویسٹ انڈیز کی ٹیم 204 رنز کے ہدف کے تعاقب میں آسٹریلوی بولنگ لائن کے سامنے ریت کی دیوار ثابت ہوئی اور صرف 27 رنز پر پویلین لوٹ گئی، ویسٹ انڈیز کے 7 بیٹر صفر پر آؤٹ ہوئے، یہ ٹیسٹ کی تاریخ میں پہلی بار ہوا ہے کہ ایک اننگز میں 7 بیٹر بغیر کوئی رنز بنائے آؤٹ ہوئے۔
آسٹریلیا کی جانب سے سٹارک کی 6 وکٹوں کے علاوہ سکاٹ بولینڈ نے ہیٹ ٹرک کی اور جیت میں مدد کی جبکہ جوش ہیزل ووڈ نے ایک کھلاڑی کو آؤٹ کیا، ویسٹ انڈیز کا آسٹریلیا کے خلاف 27 رنز پر آؤٹ ہونا ٹیسٹ کرکٹ کی تاریخ کا دوسرا سب سے کم ترین سکور ہے۔
اس سے قبل 1955 میں نیوزی لینڈ کی ٹیم انگلینڈ کے خلاف 26 رنز پر آؤٹ ہوئی تھی اور کم ترین سکور پر آؤٹ ہونے کا بدترین ریکارڈ اپنے نام کیا تھا، ویسٹ انڈیز کے خلاف تیسرے ٹیسٹ میں شاندار فتح کے بعد آسٹریلیا نے ویسٹ انڈیز کے خلاف کلین سویپ مکمل کرتے ہوئے سیریز 0-3 سے اپنے نام کرلی۔
