کنگسٹن: (ویب ڈیسک) آسٹریلیا سے ٹیسٹ میں شرمناک شکست پر کرکٹ ویسٹ انڈیز نے فوری ایکشن لیتے ہوئے ہنگامی میٹنگ طلب کر لی جس میں خطے کے سابق عظیم کھلاڑی مدعو کیا گیا ہے۔
ڈبلیو سی اے کے صدر کشور شالو نے کنگسٹن میں 27 رنز پر ڈھیر ہو کر سیریز میں 0-3 سے ناکامی کے بعد سوچ بچار شروع کر دیا، ہنگامی میٹنگ میں ٹیم کی بدترین ہار کا جائزہ لیا جائے گا، اس میں صرف رسمی حیثیت نہیں بلکہ عملی اقدامات طے کیے جائیں گے۔
انہوں نے مشاورت کے لیے سابق کرکٹرز برائن لارا، کلائیو لائیڈ اور ویوین رچرڈز کو مدعو کیا ہے، ان کے علاوہ شیونرائن چندرپال، ڈیسمنڈ ہائنز اور ایان بریڈشاؤ بھی شریک ہوں گے، یہ تمام سابق پلیئرز اپنے تجربات کی روشنی میں حقیقی اور قابل عمل سفارشات فراہم کریں گے۔
ویسٹ انڈین بورڈ چیف نے اس موقع پر کہا ہے کہ ہر ویسٹ انڈین فین کی طرح مجھے بھی اس شکست نے بہت تکلیف دی تاہم یہ تقسیم کا نہیں بلکہ مضبوط کابینہ کی جانچ کا وقت ہے، ہمیں سب کو ساتھ مل کر کام کرنا ہو گا۔
چیف نے مزید کہا ہے کہ امید ہے ٹیم ایک عزم کے ساتھ آگے بڑھے گی، خصوصاً نوجوانوں کی ترقی پر خصوصی توجہ دی جائے گی، پاکستان کے خلاف اگلی وائٹ بال سیریز سے قبل ٹیم کو مضبوط پوزیشن میں لانا ضروری ہو گیا ہے۔
