کراچی: (دنیا نیوز) پاکستان کرکٹ ٹیم کے سابق کپتان سرفراز احمد نے کہا ہے کہ اچھی ٹیم کا اعلان ہوا ہے، امید ہے سہ فریقی سیریز اور ایشیاء کپ میں اچھا پرفارم کرے گی۔
کراچی میں میڈیا سے گفتگو کرتے ہوئے سرفراز احمد نے کہا ہے کہ پاکستان کی ایک نئی ٹیم ابھر کر سامنے آ رہی ہے، ٹیم میں سلمان مرزا، صاحبزادہ فرحان، حسن نواز جیسے پلیئرز کو موقع ملا ہے۔
انہوں نے کہا ہے کہ اچھی ٹیم کا اعلان ہوا ہے، امید ہے سہ فریقی سیریز اور ایشیاء کپ میں اچھا پرفارم کرے گی، یو اے ای میں پاکستان کا ریکارڈ اچھا رہا ہے، امید ہے اس بار بھی اچھا کھیلے گی۔
سابق کپتان نے کہا ہے کہ فخر زمان ہمیشہ سے پاکستان ٹیم کے لیے ریڑھ کی ہڈی رہا ہے، جب ضرورت پڑی ہے فخر نے ٹیم کے لیے اچھا پرفارم کیا ہے۔
ان کا یہ بھی کہنا تھا کہ اولمپکس میں کرکٹ کی شمولیت خوش آئند ہے، بے فکر رہیں پاکستان ضرور کوالیفائی کرے گا، امید ہے اولمپکس میں پاکستان کرکٹ ٹیم بھی گولڈ میڈل لے کر آئے گی۔
