لاہور: (دنیا نیوز) جنوبی افریقہ کے خلاف ٹیسٹ سیریز کی تیاریوں کے سلسلے میں نیشنل کرکٹ اکیڈمی (این سی اے) میں ریڈ بال کیمپ کا آغاز 9 ستمبر سے ہو گا۔
اس کیمپ میں 11 کرکٹرز شریک ہوں گے اور کھلاڑی 8 ستمبر کو رپورٹ کریں گے، کیمپ 28 ستمبر تک جاری رہے گا، کیمپ میں ریڈ بال ہیڈ کوچ اظہر محمود نگرانی کریں گے اور ساتھ میں این سی اے کوچز اور سٹاف معاونت کریں گے۔
عبداللہ شفیق، علی رضا، اذان اویس، بابر اعظم، کامران غلام کیمپ میں شامل ہوں گے جبکہ محمد علی، محمد حریرہ، محمد سلمان، روحیل نذیر، ساجد خان اور شامل حسین بھی کیمپ کا حصہ ہوں گے۔
واضح رہے کہ کیمپ میں ان کھلاڑیوں کو بلایا گیا ہے جو حنیف محمد ٹرافی نہیں کھیل رہے، محمد رضوان اور نسیم شاہ کیریبئین پریمیئر لیگ کھیلنے میں مصروف ہیں، اس کیمپ میں کھلاڑی سناریو بیسڈ میچز بھی کھیلے گے۔
جنوبی افریقہ نے آل فارمیٹ سیریز کے لیے آئندہ ماہ پاکستان کا دورہ کرنا ہے جس میں دو ٹیسٹ میچز سمیت تین ون ڈے اور تین ٹی 20 انٹرنیشنل میچز بھی شامل ہیں۔
یاد رہے کہ پاکستان اور جنوبی افریقہ کے مابین سیریز کا پہلا ٹیسٹ لاہور میں 12 اکتوبر اور دوسرا ٹیسٹ 20 اکتوبر سے راولپنڈی میں کھیلا جائے گا۔
