لاہور: (دنیا نیوز) قومی سلیکشن کمیٹی، ہیڈ کوچ اور کپتان کے درمیان جنوبی افریقہ کے خلاف ٹیسٹ سیریز کے حوالے سے اہم مشاورت مکمل ہو گئی، گزشتہ دو روز میں ہونے والی ملاقاتوں کے بعد ٹیسٹ سکواڈ فائنل کرلیا گیا جسے منظوری کے لیے بھیج دیا گیا ہے۔
ذرائع کے مطابق قومی سکواڈ کا باضابطہ اعلان ایک دو روز میں متوقع ہے، محمد نواز کی سکواڈ میں شمولیت پر غور کیا گیا جبکہ صائم ایوب کی ناقص فارم بھی میٹنگ میں زیر بحث رہی، صائم ایوب کی جگہ امام الحق پہلی ترجیح بن گئے ہیں۔
فیصل اکرم اور ڈومیسٹک میں شاندار کارکردگی دکھانے والے آذان اویس کے نام بھی سکواڈ کے لیے زیر غور ہیں۔
ممکنہ کھلاڑیوں میں شان مسعود، امام الحق، عبداللہ شفیق، سعود شکیل، بابر اعظم، محمد رضوان اور سلمان علی آغا شامل ہیں، محمد نواز، فیصل اکرم، نعمان علی، ساجد خان، شاہین شاہ آفریدی اور محمد علی کے نام بھی امکانات میں شامل ہیں۔
ذرائع کے مطابق صائم ایوب کو ڈراپ کرنے جبکہ روحیل نذیر اور کامران غلام کو شامل کرنے پر غور کیا جا رہا ہے، فاسٹ بولر نسیم شاہ کو اس بار سکواڈ کا حصہ نہ بنانے کا امکان ہے۔
قومی ٹیسٹ سکواڈ کا کیمپ 29 ستمبر سے لگایا جائے گا جبکہ ہیڈ کوچ اظہر محمود آج عمرے کی سعادت حاصل کرنے روانہ ہوں گے، پاکستان اور جنوبی افریقہ کے درمیان پہلا ٹیسٹ 12 اکتوبر کو لاہور میں کھیلا جائے گا۔
