لاہور: (دنیا نیوز) پاکستان اور افغانستان کے درمیان وہیل چیئر ٹی 20 کرکٹ سیریز 2025 پیر 29 ستمبر سے کراچی کے یو بی ایل سپورٹس کمپلیکس میں شروع ہوگی، سیریز کی ٹرافی کی رونمائی اتوار کو کی جائے گی جبکہ پہلا میچ شام 6 بجے کھیلا جائے گا۔
پاکستان وہیل چیئر کرکٹ کونسل کے ترجمان کے مطابق یہ پہلا موقع ہے کہ افغان وہیل چیئر کرکٹ ٹیم پاکستان کا دورہ کر رہی ہے، ایشیا کپ سے قبل اس سیریز کا انعقاد نہایت اہمیت کا حامل قرار دیا جا رہا ہے۔
حکام کے مطابق چار ٹی 20 میچز پر مشتمل سیریز کا دوسرا میچ 30 ستمبر، تیسرا میچ یکم اکتوبر اور چوتھا میچ 2 اکتوبر کو ہو گا، یہ سیریز قومی ٹیم کو ایشیا کپ سے پہلے بھرپور تیاری کا موقع فراہم کرے گی۔
قومی وہیل چیئر کرکٹ ٹیم کی قیادت محمد ذیشان کریں گے جبکہ عمران آرائیں نائب کپتان ہوں گے، دیگر کھلاڑیوں میں محمد فیاض، احمد یار سینئر، مثال خان، صدر ایوب، توصیف ملک، مبین اقبال، اسامہ طارق، جمعہ خان، زاور خان، وقاص سعید، سعید بنوں اور ساجد خان شامل ہیں، ریزرو کھلاڑیوں میں سعید خان، شاہ فیصل اور گوہر آفریدی شامل کیے گئے ہیں۔
ٹیم کے کوچ سید فیضان باقر نقوی جبکہ رضوان الحق ٹیم مینجر کے فرائض انجام دیں گے، پاکستان نومبر میں تیسرے ایشیا کپ کی میزبانی بھی کرے گا جس میں چھ ٹیمیں شریک ہوں گی۔
