راولپنڈی: (دنیا نیوز) جنوبی افریقی کرکٹر کگیسو ربادا نے پاکستان کے خلاف دوسرے ٹیسٹ میں شاندار اننگز کھیل کر 119 سال پرانا ریکارڈ توڑ دیا۔
بدھ کو پنڈی سٹیڈیم میں پاکستان کے پہلی اننگز کے 333 رنز کے جواب میں جنوبی افریقی بیٹر ربادا 11ویں نمبر پر بیٹنگ کرنے آئے اور صرف 61 گیندوں پر 71 رنز کی اننگز کھیل کر اپنی ٹیم کو سبقت دلانے میں کامیاب ہوئے۔
ربادا نے اپنی اننگز کے دوران 4 چوکے اور 4 چھکے لگائے اور دسویں وکٹ کے لیے متھوسامے کے ساتھ 98 رنز کی قیمتی شراکت قائم کی۔
ربادا کی شاندار اننگز کی بدولت جنوبی افریقا نے پاکستان کے خلاف پہلی اننگز میں 404 رنز اسکور کیے اور 71 رنز کی اہم برتری حاصل کی، اسی کے ساتھ ربادا نے ٹیسٹ کرکٹ میں جنوبی افریقا کی جانب سے 11 ویں نمبر پر بیٹنگ کرتے ہوئے سب بڑا انفرادی سکور کا 119 سال پرانا ریکارڈ توڑ دیا۔
رباڈا سے قبل جنوبی افریقا کی جانب سے ٹیسٹ کرکٹ میں 11 ویں نمبر پر بیٹنگ کرتے ہوئے سب سے زیادہ انفرادی سکور کا ریکارڈ برٹ وولگر کے نام تھا، جنہوں نے 1906 میں انگلینڈ کے خلاف کیپ ٹاؤن ٹیسٹ کی پہلی اننگز میں ناقابلِ شکست 62 رنز بنائے تھے۔
واضح رہے کہ ٹیسٹ کرکٹ میں 11 ویں نمبر کے بیٹر کی جانب سے سب سے زیادہ رنز بنانے کا عالمی ریکارڈ آسٹریلیا کے ایشٹن ایگر کے پاس ہے، جنہوں نے 2013 میں ایشیز سیریز ٹیسٹ میں انگلینڈ کے خلاف 98 رنز بنائے تھے۔
