کراچی: (ویب ڈیسک) شہر قائد میں شادی کی تقریب میں ہوائی فائرنگ سے کمسن بچہ ہلاک جبکہ 2 افراد زخمی ہوگئے۔
پولیس کے مطابق واقعہ سرجانی ٹاؤن تھانے کےعلاقے تیسر ٹاؤن میں پیش آیا، فائرنگ سے جاں بحق ہونے والے بچے کی شناخت 6 سالہ بنجو ولد آئزک کے نام سے ہوئی ہے، زخمیوں میں 6 سالہ ایلن اور 30 سالہ روبن شامل ہیں۔
واقعہ کی اطلاع پر پولیس بھی موقع پر پہنچ گئی اور فوری کرائم سین یونٹ کو بھی شواہد اکٹھا کرنے کے لیے طلب کرلیا، پولیس حکام کے مطابق ابتدائی تحقیقات کے مطابق بارات لیکر جانے والے افراد شادی میں فائرنگ کررہے تھے، اسی دوران حادثاتی طور پر واقعہ پیش آیا۔
پولیس نے موقع پر پہنچ کر فائرنگ میں استعمال ہونے والی پستول برآمد کرلی جبکہ فائرنگ میں ملوث ملزمان کی گرفتاری کیلئے مزید قانونی کارروائی شروع کر دی گئی۔
