لاہور: معمر خاتون کی بالیاں نوچنے والا ملزم ساتھی سمیت پولیس مقابلے میں مارا گیا

لاہور: (ویب ڈیسک) معمر خاتون کی بالیاں نوچنے والا ملزم ساتھی سمیت پولیس مقابلے میں مارا گیا۔

مناواں میں پولیس اور خطرناک اشتہاری ملزموں کے درمیان مبینہ مقابلہ ہوا، جس کے نتیجے میں معمر خاتون کے کان سے بالیاں نوچنے والا مرکزی ملزم فراست علی اپنے ساتھی جون شاہ سمیت مارا گیا، دونوں ڈاکو پولیس کو کئی سنگین وارداتوں میں مطلوب تھے۔

ذرائع کے مطابق یہ مقابلہ اس وقت پیش آیا جب سی سی ڈی کینٹ کی ٹیم نے ملزموں کو گرفتار کرنے کی کوشش کی،جس پر ملزمان نے فائرنگ شروع کر دی، مقابلے کے دوران ایس ایچ او عاطف ذوالفقار بال بال بچ گئے، جبکہ فائر کی گئی گولیاں ان کی بلٹ پروف جیکٹ پر لگیں۔

پولیس کے مطابق ہلاک ہونے والا مرکزی ملزم فراست علی چند روز قبل لاہور کے علاقے غازی آباد میں بزرگ خواتین کے کانوں سے بالیاں نوچ کر فرار ہو گیا تھا، ویڈیوز وائرل ہونے کے بعد واقعے پر وزیراعلیٰ پنجاب مریم نواز نے فوری نوٹس لیا تھا اور ملزموں کی گرفتاری کے احکامات جاری کئے تھے۔

سی سی ڈی ذرائع کا کہنا ہے کہ دونوں ہلاک ملزم ریکارڈ یافتہ تھے اور لاہور سمیت مختلف علاقوں میں متعدد وارداتوں میں پولیس کو مطلوب تھے۔