لاہور: (دنیا نیوز) پولیس نے میو ہسپتال سے اغواء ہونے والی بچی کو بحفاظت بازیاب کر کے خاتون ملزمہ کو گرفتار کر لیا۔
ایس ایس پی انویسٹی گیشن محمد نوید نے دو دن کی معصوم بچی کے اغواء کا فوری نوٹس لیا تھا جس کے بعد ایس پی انویسٹی گیشن سٹی کی سربراہی میں بچی کی بازیابی کیلئے خصوصی ٹیمیں تشکیل دی گئیں۔
انچارج انویسٹی گیشن اور ایس ایچ او تھانہ گوالمنڈی نے مشترکہ کارروائی کرتے ہوئے خاتون ملزمہ رابعہ کو گرفتار کر کے بچی کو بحفاظت بازیاب کرا لیا، ملزمہ چند روز قبل میو ہسپتال کے بچہ وارڈ سے بچی کو اغواء کر کے لے گئی تھی۔
ابتدائی تحقیقات میں معلوم ہوا کہ ملزمہ نے لوگوں کو دکھانے کیلئے بچی کو اغواء کیا، ملزمہ کی گرفتاری سی سی ٹی وی کیمروں اور ہیومن انٹیلیجنس کے ذریعے حاصل کی گئی معلومات سے ہوئی۔
ایس پی فرحت عباس نے کہا کہ بچی کی بازیابی پر والدین نے پولیس ٹیم کا شکریہ ادا کیا اور نیک تمناؤں کا اظہار کیا۔
ایس ایس پی محمد نوید نے کہا کہ آپریشن اور انویسٹی گیشن پولیس کی مشترکہ ٹیموں کی محنت کا نتیجہ ہے اور ملزمہ کو مضبوط چالان کے بعد قانونی کارروائی کے تحت سزا دی جائے گی، انہوں نے واضح کیا کہ معصوم بچوں کے اغواء کے عناصر کسی رعایت کے مستحق نہیں ہیں۔
ڈی آئی جی انویسٹی گیشن سید ذیشان رضا نے پولیس ٹیم کے لئے تعریفی اسناد کا اعلان بھی کیا۔
