کراچی: (دنیا نیوز) جعلی میجر بن کر شارٹ ٹرم اغوا کی وارداتوں میں ملوث مطلوب اشتہاری ملزموں کو گرفتار کر لیا گیا۔
پولیس حکام نے بتایا کہ بوٹ بیسن پولیس نے کارروائی کرتے ہوئے دو ملزموں کو گرفتار کیا، گرفتار ملزموں میں طلال افسر عرف میجر ظفر جعلی اور امام بخش شامل ہے، ملزمان کے قبضے سے اسلحہ، گاڑی، چار وائرلیس واکی ٹاکی سیٹس، تین بلٹ پروف جیکٹس اور چار موبائل فونز برآمد کر لئے گئے۔
ابتدائی تفتیش میں ملزموں نے اعتراف کیا کہ وہ جعلی میجر بن کر اپنے دیگر ساتھیوں کے ساتھ شارٹ ٹرم اغوا برائے تاوان کی وارداتوں میں ملوث ہیں، ملزموں نے مدعی تاج الدین سے دو اقساط میں 80 لاکھ روپے تاوان وصول کرنے کا اعتراف بھی کیا۔
پولیس کے مطابق واقعہ کا مقدمہ تھانہ ٹیپو سلطان میں درج ہے، گرفتار ملزمان تھانہ بوٹ بیسن کے ایک مقدمے میں بھی ملوث پائے گئے ہیں، ملزم طلال افسر عرف میجر ظفر پہلے ہی تھانہ سپر مارکیٹ اور تھانہ گلشن اقبال میں درج مقدمات میں عدالتوں کی جانب سے اشتہاری قرار دیا جاچکا ہے۔
پولیس نے گرفتار ملزموں کے خلاف مزید مقدمات تھانہ بوٹ بیسن میں درج کرلئے، ملزموں کے دیگر ساتھیوں کی گرفتاری کے لئے چھاپے مارے جارہے ہیں، گرفتار ملزموں سے دورانِ تفتیش مزید اہم انکشافات متوقع ہیں۔
