اسلام آباد: (دنیا نیوز) تھانہ مارگلہ کی حدود میں نجی مال میں خاتون کیساتھ مبینہ زیادتی، گرفتار دونوں ملزمان نے خاتون سے زیادتی کا اعتراف کر لیا۔
پولیس کی جانب سے گرفتار ملزم فیصل جلال اور حفیظ اللہ کو ڈسٹرکٹ اینڈ سیشن کورٹس اسلام آباد پیش کیا گیا، عدالت نے ملزمان کو 3 روزہ جسمانی ریمانڈ پر پولیس کے حوالے کر دیا۔
پولیس نے میڈیکل چیک اپ کیلئے جسمانی ریمانڈ کی استدعا کی تھی، جوڈیشل مجسٹریٹ مرید عباس نے کیس پر سماعت کی، متاثرہ خاتون کی مدعیت میں مقدمہ تھانہ مارگلہ میں مقدمہ درج ہے۔
مقدمہ کے متن کے مطابق متاثرہ خاتون گاؤں سے اسلام آباد نوکری کے سلسلے میں آئی، فیس بک سے نوکری کی تلاش کر رہی تھی کال سینٹر نے مجھے نوکری کے لیے بلا لیا۔
متن کے مطابق 21 تاریخ کو فیصل نامی شخص سے رابطہ ہوا تو اس نے مجھے نجی شاپنگ مال بلایا، حفیظ اللہ نامی شخص نیچے آیا اور مجھے فلیٹ میں لے گیا۔
مدعیہ کے مطابق گپ شپ لگانے کے بعد مجھے زبردستی زیادتی کا نشانہ بنایا گیا، ملزمان کی جانب سے مجھے تھپڑ اور مکے مارے گئے۔
مقدمہ کے مطابق پولیس کو ون فائیو پر اطلاع دی گئی تو موقع کر پہنچ کر دو افراد کو گرفتار کیا گیا، ملزمان کے خلاف فوری قانونی کارروائی کی جائے۔
