کراچی: (دنیا نیوز) سینئرسول جج جنوبی، سٹی کورٹ کی عدالت میں کچرا اٹھانے والے ٹرک کی ٹکر سے شہری کی ہلاکت کا کیس، عدالت نے آٹھ سال بعد درخواست کا فیصلہ کر دیا۔
عدالت نے ٹرک مالکان اور ڈرائیور کو 4 کروڑ 27 لاکھ سے زائد ہرجانہ ادا کرنے کا حکم دیا، ہرجانہ مقتولین کے لواحقین کو ادا کیا جائے گا، ہرجانے کی رقم 1 ماہ کے اندر ادا کی جائے۔
درخواست کے مطابق حادثہ نارتھ کراچی میں نومبر 2017 کو پیش آیا تھا، مقتول عمر اور اُس کا دوست غیاث موٹر سائیکل پر جا رہے تھے، ٹرک نے پیچھے ٹکر ماری جس کے نتیجے میں عمر جاں بحق جبکہ غیاث زخمی ہوا۔
لواحقین کی جانب سے ٹرک مالکان، کلفٹن کنٹونمنٹ، نجی بینک، ڈرائیور سمیت 6 فریقین کو نامزد کیا تھا، عدالت نے ٹرک مالکان اور ڈرائیور کو قصوروار ٹھہراتے ہوئے باقیوں کو بری الزمہ قرار دیا۔
ملزمان کا موقف تھا کہ مدعا علیہان کے خلاف درج کرمنل مقدمے میں سیشن کورٹ اُنہیں بری کرچکی ہے، ایسا کوئی حادثہ ٹرک سے نہیں ہوا۔
عدالت کے مطابق کرمنل مقدمہ کا فیصلہ سول سوٹ پر اثر انداز نہیں ہوسکتا، مدعا علیہان نے تحریری طور پر حادثے کا انکار نہیں کیا، مدعا علیہان نے اچانک شواہد قلمبند کرتے وقت موقف بدل دیا۔
عدالت کے مطابق مدعا علیہان کی جانب سے درخواست گزار کے ہرجانے پر بھی کوئی اعتراض نہیں کیا گیا، رپورٹ سے ثابت ہوا کہ ٹرک کا فرنٹ حصہ ڈیمج تھا۔
