سیؤل: (ویب ڈیسک) جنوبی کوریا کے معروف اداکار سونگ یونگ کیو کی لاش گاڑی سے برآمد ہوئی ہے۔
کورین میڈیا کے مطابق جنوبی کوریائی اداکار سونگ یونگ کیو جنوبی سیؤل کے علاقے یونگ اِن میں ایک پارک شدہ کار کے اندر مردہ حالت میں پائے گئے، شہریوں نے فوری طور پر حکام کو اطلاع دی۔
کوریائی حکام نے کہا ہے کہ اداکار کی موت کی وجہ تاحال معلوم نہیں ہو سکی۔
واضح رہے کہ جون میں 55 سالہ سونگ یونگ کو شراب پی کر گاڑی چلانے کے مقدمے میں گرفتار کیا گیا تھا، وہ مبینہ طور پر نشے کی حالت میں تقریباً 5 کلومیٹر تک گاڑی چلاتے رہے جو کہ جنوبی کوریا کے قانون کے مطابق ڈرائیونگ لائسنس منسوخ کرنے کے لیے کافی ہوتا ہے۔
اس واقعہ کے بعد انہیں بغیر حراست کے پراسیکیوشن کے حوالے کر دیا گیا تھا، تنازع کے بعد اداکار کو کئی فلمی منصوبوں سے بھی نکال دیا گیا تھا۔
کورین اداکار کے انتقال کے بعد اُن کے اہلِ خانہ کی جانب سے تاحال کوئی باضابطہ بیان جاری نہیں کیا گیا۔
