ممبئی: (ویب ڈیسک) بھارتی اداکارہ تمنا بھاٹیا نے بھارتی کرکٹر ویرات کوہلی اور پاکستانی عبدالرزاق کے ساتھ تعلقات کی افواہوں پر پہلی بار کھل کر ردعمل دیتے ہوئے ایسے کسی بھی تعلق سے انکار کیا ہے۔
بھارتی میڈیا کے مطابق 2010 میں تمنا اور ویرات کوہلی کی ایک کمرشل شوٹ کی تصویر وائرل ہوئی تھی، جس کے بعد ان کے تعلقات کی افواہیں زور پکڑ گئی تھیں۔
ایک انٹرویو میں ویرات کوہلی سے منسوب افواہوں پر تمنا نے کہا کہ مجھے بہت برا لگتا ہے کیونکہ میں ان سے صرف ایک دن کے لیے ملی تھی، شوٹ کے بعد نہ کبھی بات ہوئی، نہ ملاقات ہوئی۔
اسی طرح 2020 میں سابق پاکستانی کرکٹر عبدالرزاق سے متعلق گردش کرتی دوسری افواہ یہ تھی کہ تمنا نے ان سے خفیہ شادی کر لی ہے، اس کی وجہ ایک پرانی تصویر تھی جس میں اداکارہ اور عبدالرزاق کو جیولری کی دکان پر ایک ساتھ دیکھا گیا۔
تمنا بھاٹیا نے ہنستے ہوئے کہا کہ مذاق مذاق میں، عبدالرزاق! انٹرنیٹ واقعی ایک مزے کی جگہ ہے، انٹرنیٹ کے مطابق تو میری عبدالرزاق سے شادی بھی ہو چکی تھی۔
انہوں نے عبدالرزاق کو مخاطب کرتے ہوئے کہا کہ معاف کیجئے گا سر، آپ کے تو بچے ہیں۔
اداکارہ نے وضاحت کی کہ وہ تصویر دراصل ایک جیولری کی دکان کے افتتاح کے موقع کی ہے، جہاں عبدالرزاق اور وہ اتفاقاً شریک ہوئے تھے، یہ بہت عجیب ہوتا ہے، جب کسی سے کوئی تعلق ہی نہ ہو اور لوگ خود سے کہانیاں بنا لیں لیکن آپ کچھ نہیں کر سکتے۔
انہوں نے کہا کہ آپ کو قبول کرنا پڑتا ہے کہ لوگ جو چاہیں گے، وہی سوچیں گے، آپ ہر کسی کو بیٹھ کر سمجھا نہیں سکتے۔
