نئی دہلی : (ویب ڈیسک) بالی ووڈ کے اداکار عامر خان اور دنگل سٹار فاطمہ ثنا شیخ کی خفیہ طور پر شادی کی افواہوں کو جعلی قرار دیدیا گیا۔
واضح رہے کہ کرن راؤ عامر خان کی دوسری اہلیہ تھیں جن سے ان کا ایک بیٹا آزاد راؤ ہے۔ جبکہ ان کی پہلی بیوی کا نام رینا دتہ ہے جس سے ان کے دو بچے ایرا اور جنید ہیں۔ عامر خان کی پہلی شادی کا انجام بھی طلاق کی صورت میں ہوا تھا۔
عامر خان اور ان کی سابق اہلیہ کرن راؤ نے تقریباً 15 برس تک شادی شدہ رہنے کے بعد رواں اگست 2021ء میں راہیں جدا کرلی تھیں۔ دونوں کی طلاق کی وجہ اداکارہ فاطمہ ثنا شیخ کو قرار دیا جارہا تھا جو فلم ’’دنگل‘‘ میں عامر خان کی بیٹی بنی تھیں۔
عامر خان کی تیسری شادی کے حوالے سے کئی خبریں سامنے آرہی ہیں۔ حال ہی میں عامر خان اور فاطمہ ثنا شیخ کی تصویر سوشل میڈیا پر وائرل ہورہی ہے جس کے بعد لوگوں نے قیاس آرائیاں شروع کردی ہیں کہ دونوں اداکار خفیہ طور پر شادی کے بندھن میں بندھ گئے۔
تو کیا عامر خان اور فاطمہ ثنا شیخ اب شادی شدہ ہیں؟ سچ کیا ہے ہم آپ کو بتاتے ہیں۔ حال ہی میں ٹوئٹر پر عامر خان اور فاطمہ ثنا شیخ کی ایک تصویر وائرل ہوئی اور ٹوئٹ میں دعویٰ کیا گیا کہ فاطمہ ثنا شیخ عامر کی تیسری بیوی ہیں۔ تاہم اس بات میں کوئی حقیقت نہیں اور نہ ہی یہ تصویر حقیقی ہے بلکہ اسے کمپیوٹر پر ایڈٹ کیا گیا ہے۔
یہ تصویر دراصل عامر خان اور ان کی سابق دوسری بیوی کرن راؤ کی ہے جو انہوں نے ایک منگنی کی تقریب میں کھنچوائی تھی۔ کسی نے اس تصویر کو ایڈٹ کرکے اس میں کرن راؤ کی جگہ فاطمہ ثنا شیخ کا چہرہ لگادیا۔
لہذا تصویر کی حقیقت سے ثابت ہوگیا کہ فی الحال عامر خان اور فاطمہ ثنا شیخ نے خفیہ طور پر کوئی شادی نہیں کی۔ تاہم مستقبل میں دونوں شادی کریں گے یا نہیں اس بارے میں کچھ کہا نہیں جا سکتا۔
