اسلام آباد : (ویب ڈیسک ) وفاقی وزیرِ صحت عبدالقادر پٹیل نے کہا ہے کہ حفاظتی ٹیکہ جات پروگرام کی کارکردگی کو مزید بہتر بنانے کے لیے مؤثر اقدامات کر رہے ہیں۔
وفاقی وزیرِ صحت عبدالقادر پٹیل کی زیر صدارت فیڈرل ڈائریکٹوریٹ آف امیونائزیشن کا سالانہ جائزہ اجلاس ہوا جس میں حفاظتی ٹیکہ جات پروگرام کی کارکردگی کا جائزہ لیا گیا۔
اس حوالے سے ترجمان وزارت صحت کا کہنا ہے کہ اجلاس میں چاروں صوبوں، گلگت بلتستان اور آزاد کشمیر کے صوبائی کوآرڈی نیٹرز نے شرکت کی، اجلاس میں گاوی، گیٹس فاؤنڈیشن اور عالمی ادارۂ صحت کے نمائندوں نے بھی شرکت کی۔
وزارت صحت کے ترجمان کے مطابق عالمی ادارہ برائے اطفال یونیسیف کے نمائندگان بھی اجلاس میں شریک ہوئے۔
اجلاس سے خطاب کرتے ہوئے وفاقی وزیرصحت کا کہنا تھا کہ حفاظتی ٹیکہ جات کی رسائی 100 فیصد یقینی بنانے کی حکمتِ عملی بنائی جا رہی ہے۔
