اسلام آباد: (دنیا نیوز) مسلم لیگ ن کے صدر، قومی اسمبلی میں اپوزیشن لیڈر اور سابق وزیراعلیٰ پنجاب میاں محمد شہباز شریف کیلئے ایک اور امتحان آ گیا، سپریم کورٹ میں ضمانت منسوخی کیلئے دائر اپیل کی سماعت 22 اکتوبر کو ہوگی۔
دنیا نیوز کے مطابق اپوزیشن لیڈر میاں محمد شہباز شریف کی ضمانت منسوخی کے لیے دائر نیب اپیلیں کی سماعت کیلئے مقرر کر دی گئی ہیں، سپریم کورٹ کا تین رکنی بنچ ساڑھے پانچ ماہ 22 اکتوبر کو سماعت کرے گا۔
ذرائع کے مطابق نیب نے سپریم کورٹ میں میاں شہباز شریف کیخلاف صاف پانی اور آشیانہ سکینڈلز میں ضمانت کی منسوخی کیلئے رجوع کر رکھا ہے۔
یاد رہے کہ لاہور ہائیکورٹ نے شہباز شریف کی آشیانہ ہاؤسنگ اسکیم اور رمضان شوگر مل کیس میں ضمانت کی درخواست منظور کی تھی اور انہیں رہا کرنے کا حکم دیا تھا۔ جس بنچ کیس کی سماعت کی تھی اس کے سربراہ جسٹس ملک شہزاد احمد تھے۔
عدالت نے شہباز شریف کی آشیانہ ہاؤسنگ سکیم اور رمضان شوگر مل کیس میں اور فواد حسن فواد کی صرف آشیانہ ہاؤسنگ اسکیم میں ضمانت منظور کی تھی جبکہ عدالت نے شہباز شریف کو 2 کروڑ روپے کے مچلکے جمع کرانے کا حکم دیا ہے۔عدالت نے اپنے فیصلے میں فواد حسن فواد کی آمدن سے زائد اثاثہ جات کیس میں درخواست ضمانت مسترد کر دی تھی۔
واضح رہے کہ نیب آشیانہ اقبال ہاؤسنگ سکیم، صاف پانی کیس اور اربوں روپے کے گھپلوں کی تحقیقات کر رہا ہے جس میں سابق وزیراعلیٰ پنجاب شہباز شریف سمیت دیگر نامزد ہیں۔ آشیانہ اقبال ہاؤسنگ سکیم میں ایل ڈی اے کے سابق ڈائریکٹر جنرل احد چیمہ اور سابق وزیراعظم نواز شریف کے پرنسپل سیکریٹری فواد حسن فواد پہلے ہی گرفتار کیے جاچکے ہیں۔
