اسلام آباد: (دنیا نیوز) قومی احتساب بیورو (نیب) کے چیئرمین جسٹس ریٹائرڈ جاوید اقبال نے ایک مرتبہ پھر اس عزم کا اعادہ کیا ہے کہ میگا کرپشن کیسز کو منطقی انجام تک پہنچانا قومی ادارے کی اولین ترجیح ہے۔
تفصیل کے مطابق چیئرمین نیب جاوید اقبال نے ان خیالات کا اظہار اپنے زیر صدارت ہونے والے اہم اجلاس میں کیا۔ ان کا کہنا تھا 179 میگا کرپشن کیسز میں سے 101 ریفرنسز عدالتوں میں دائر کر دیے گئے ہیں جبکہ 46 میگا کرپشن کیسز کو پہلے ہی نمٹایا جا چکا ہے۔
چیئرمین نیب نے کہا کہ میگا کرپشن کیسز کی 13 انکوائریز اور 19 انوسٹی گیشنز جاری ہیں۔ نیب لوٹی گئی 328 ارب روپے کی رقم قومی خزانے میں جمع کرا چکا ہے۔
یہ بھی پڑھیں: چیئرمین نیب کی بجائے فیصلہ سازی کا اختیار کمیشن کے سپرد ہوگا: آرڈیننس تیار
ادھر حکومت نے نیب قانون میں بڑی تبدیلیاں کرنے کا فیصلہ کر لیا ہے۔ چیئرمین نیب کے اختیارات کمیشن کو منتقل کر دئیے جائیں گے۔ نیب ایک ارب روپے سے کم مالیت کے کرپشن مقدمات کی تحقیقات نہیں کر سکے گا۔
وزارت قانون ذرائع کے مطابق آرڈیننس کے بعد نیب ایک ارب روپے سے کم مالیت کے کرپشن مقدمات کی تحقیقات نہیں کر سکے گا اور صرف میگا کرپشن کے کیسز ہی نیب دائرہ کار میں آئیں گے۔ چئیرمین نیب کے اختیارات کمیشن کو منتقل کر دئیے جائیں گے اور اعلیٰ سطح کمیشن ہی فیصلے کرے گا۔
ضمانت کے معاملات کی سماعت کے اختیارات بھی نیب عدالتوں کو دئیے جائیں گے۔ ذرائع کے مطابق نئے ترمیمی آرڈیننس سے قبل سیاسی جماعتوں کو بھی اعتماد میں لیا جائے گا۔
