لاہور: (دنیا نیوز) کراچی طیارہ حادثہ میں شہید پائلٹ سجاد گل کے والد گل محمد بھٹی نے پی آئی اے انکوائری کو مسترد کر دیا ہے۔ گورنر پنجاب چودھری سرور نے سجاد گل کے اہلخانہ کو انصاف کی یقین دہانی کرائی ہے۔
تفصیل کے مطابق گورنر پنجاب چودھری محمد شرور عید کے دوسرے روز شہید کیپٹن پائلٹ سجاد گل کے گھر پہنچے اور ان کے اہلخانہ سے تعزیت اور فاتحہ خوانی کی۔
اس موقع پر شہید پائلٹ کے والد گل محمد بھٹی پی آئی اے حکام پر برس پڑے اور کہا کہ حکام نااہل اور نالائق ہیں، تحقیقات کرا کے خود ہی لیک کراتے ہیں، جسے مسترد کرتے ہیں۔
گل محمد بھٹی کا کہنا تھا کہ پی آئی اے رپورٹس کو مسترد کرتے ہیں۔ جب تک بلیک باکس کی رپورٹ نہیں آ جاتی، کسی رپورٹ پر اعتبار نہیں کریں گے۔
اس موقع پر چودھری سرور نے کہا کہ تحقیقات غیر جانبدار ہوں گی، کسی قسم کی رعایت نہیں برتی جائے گی۔ بلیک باکس کی ریکارڈنگ خاندان کو فراہم کریں گے۔ انہوں نے سجاد گل شہید کے اہلخانہ کو انصاف کی یقین دہانی کرائی۔
