لاہور: (روزنامہ دنیا) پٹرولیم مصنوعات کے بعد موبل آئل کی قیمتیں بھی بڑھ گئیں۔ مختلف کمپنیوں اور برانڈز کے موبل آئل کی فی لٹر قیمت میں چند ماہ کے دوران 80 روپے کا اضافہ ہو گیا۔
ذرائع کے مطابق مقامی آئل مارکیٹنگ کمپنیوں کے موبل آئل کی فی لٹر قیمت چند ماہ قبل 490 روپے تھی جو کہ مسلسل اضافے سے 570 روپے فی لٹر تک جا پہنچی ہے۔
اسی طرح درآمدی موبل آئل کے مختلف برانڈز کی قیمتوں میں بھی غیر معمولی اضافہ ہو چکا ہے۔
یہ بھی پڑھیں: حکومت نے پٹرول کی قیمت میں 3 روپے فی لٹر اضافہ کر دیا
خیال رہے کہ گزشتہ دنوں فی لٹر پٹرول کی قیمت میں 3 روپے کا اضافہ کیا گیا تھا۔ وزارت خزانہ کی طرف سے جاری کردہ نوٹیفکیشن کے مطابق فی لیٹر پٹرول کی قیمت میں 3 روپے کا اضافہ ریکارڈ کیا گیا جس کے بعد پیٹرول کی فی لٹر قیمت 103 روپے 69 پیسے مقرر کی گئی ہے۔
دوسری طرف ہائی سپیڈ ڈیزل کی قیمت بھی 3 روپے اضافے کے بعد 108روپے 44 پیسے ہو گئی ہے جبکہ مٹی کا تیل 5 روپے اضافے کے بعد 70روپے 29 پیسہ کا ہو گیا ہے۔ لائٹ ڈیزل آئل کی قیمت بھی 5 روپے اضافے کے بعد 67 روپے 86 پیسہ فی لیٹر مقررکر دی گئی ہے۔
یہ بھی پڑھیں: پٹرولیم مصنوعات پر لیوی میں کمی، سیلز ٹیکس بڑھا دیا گیا
ادھر حکومت نے پٹرولیم مصنوعات پر پٹرولیم لیوی میں کمی جبکہ سیلز ٹیکس بڑھا دیا ہے۔ پٹرول پر پٹرولیم لیوی 4 روپے 55 پیسے فی لٹر کم اور سیلز ٹیکس 44 پیسے بڑھا دیا گیا ہے، اطلاق رات بارہ بجے سے کر دیا گیا ہے۔
پٹرول پر پٹرولیم لیوی کم کر کے 24 روپے 13 پیسے کر دی گئی ہے۔ ہائی سپیڈ ڈیزل پر لیوی 2 روپے 47 پیسے فی لیٹر کی کم کر کے 25 روپے 10 پیسے فی لیٹر کردی گئی ہے۔ ذرائع کے مطابق پٹرول پر سیلز ٹیکس 44 پیسے بڑھا کر 15 روپے 07 پیسے ہو گیا ہے، ہائی سپیڈ ڈیزل بھی سیلز ٹیکس 44 پیسے بڑھا گیا ہے جس کے بعد ڈیزل پر سیلز ٹیکس بڑھ کر 15 روپے 76 پیسے فی لٹر ہوگیاہے۔
ڈیزل پر فریٹ مارجن ایک پیسے کمی کے بعد 74 پیسے فی لٹر ہوگیا ہے، حکومت نے پٹرول پر فریٹ مارجن میں 6 پیسے فی لٹر کا اضافہ کیا ہے۔ اب پٹرول پر فریٹ مارجن 3 روپے پچاس پیسے فی لٹر ہوگیاہے، لیوی اور سیلز ٹیکس میں ردوبدل کے بعد پٹرول کی ایکس ریفائنری قیمت بڑھ کر 54 روپے 48 پیسے فی لٹر اور ڈیزل کی ایکس ریفائنری قیمت 60 روپے 91 پیسے فی لٹر ہو گئی ہے۔
