لاہور: (دنیا نیوز) سابق امریکی نمائندہ خصوصی برائے افغانستان زلمے خلیل زاد کی ٹوئٹ پر پاکستان تحریک انصاف کے رہنما فواد چودھری اور مسلم لیگ ن کا ردعمل آگیا۔
سابق امریکی نمائندہ خصوصی برائے افغانستان اور پاکستان زلمے خلیل زاد کی ٹوئٹ پر رد عمل دیتے ہوئے فواد چودھری نے اپنے پیغام میں کہا کہ پاکستان کی صورتحال پر تشویش بڑھ رہی ہے۔
فواد چودھری نے کہا کہ زلمے خلیل زاد، سینیٹر جیکی روزن، کانگریس میں مائیک لوون اور اب امریکی محکمہ خارجہ کی انسانی حقوق پر رپورٹ پاکستان میں گرفتاریوں اور تشدد پر شدید تشویش ظاہرکر رہی ہے۔
پاکستان کی صورتحال پرتشویش بڑہ رہی ہے زلمے خلیل زاد،سینیٹر جیکی روزن، کانگریس میں مائیک لوون اور اب امریکی محکمہ خارجہ کی انسانی حقوق پر رپورٹ پاکستان میں گرفتاریوں اورتشدد پر شدید تشویش ظاہرکر رہی ہے، پاکستان سفارتی طور پر تنہا ہے سعودی عرب اور امارات جیسے دوست ملک فاصلے پر ہیں https://t.co/BCZg2nGgVp
— Ch Fawad Hussain (@fawadchaudhry) March 22, 2023
انہوں نے مزید کہا کہ پاکستان سفارتی طور پر تنہا ہے، سعودی عرب اور امارات جیسے دوست ملک فاصلے پر ہیں۔
ایک اور ٹویٹ میں فواد چودھری کا کہنا تھا کہ حکومت ڈمی پارلیمان کے اجلاس میں کوئی ایسا قدم نہ اٹھائے جس سے سیاسی بحران سنبھالا نہ جا سکے، صوبائی انتخابات میں ایک دن کی تاخیر بھی آئین سے ماوراء ہو گی، سپریم کورٹ پر دباؤ کی تمام کوششوں کومسترد کرتے ہیں، اب وکٹ اٹھا کر بھاگو مت مقابلہ کرو۔
حکومت سے کہتا آج ڈمی پارلیمان کے اجلاس میں کوئ ایسا قدم نہ اٹھائیں جس سے پاکستان میں سیاسی بحران اتنا بڑہ جائے کہ سنبھالا نہ جا سکے، صوبائ انتخابات میں ایک دن کی تاخیر بھی آئین سے ماوراء ہو گی ،سپریم کورٹ پر دباؤ کی تمام کوششوں کومسترد کرتے ہیں،اب وکٹ اٹھا کر بھاگوں مت مقابلہ کرو
— Ch Fawad Hussain (@fawadchaudhry) March 22, 2023
زلمے خلیل زاد کی ٹویٹ پر مسلم لیگ (ن) کے ٹوئٹر اکاؤنٹ سے بھی ایک ٹویٹ کی گئی، جس میں کہا گیا کہ پاکستان کو یہ بتانے کا شکریہ کہ اصل ”درآمد شدہ“ کٹھ پتلی کون ہے۔ کٹھ پتلی بے نقاب ہے!
Thank you for telling Pakistan who the real "Imported" puppet is. Your stooge stands exposed! #BringItOn https://t.co/VrqWG1at4b
— PMLN (@pmln_org) March 21, 2023
اس سے قبل زلمے خلیل زاد نے اپنی ٹویٹ میں کہا تھا کہ ایسے اشارے مل رہے ہیں کہ حکومت سپریم کورٹ سے عمران خان کو نااہل کرانے کی کوشش کرے گی، الیکشن سے روکنے اور پی ٹی آئی پر پابندی کی کوشش کی جائے گی۔
انہوں نے کہا تھا کہ بظاہر حکومت نے عمران خان کو ریاست کا دشمن قرار دینے کا فیصلہ کرلیا ہے، ایسے اقدامات سے پاکستان مزید بحرانوں کا شکار ہوجائے گا، پاکستان کو سیاسی، معاشی اور سکیورٹی بحرانوں کا سامنا ہے، بعض ممالک نے پاکستان میں طے شدہ سرمایہ کاری بھی معطل کردی ہے۔
زلمے خلیل زاد نے مزید کہا تھا کہ امید ہے سپریم کورٹ قومی مفادات میں ایسے کھیل کا حصہ نہیں بنے گی، پاکستان سے متعلق میری تشویش دن بدن بڑھتی جاری ہے۔
