پیرس: (دنیا نیوز) فرانس میں مقیم پاکستانی سول کمیونٹی اور فرانسیسی عوام نے 9 مئی کے واقعات پر فرانسیسی صدر میکرون کو خط لکھ دیا۔
خط میں کہا گیا ہے کہ پاکستان کے حالیہ سیاسی اور معاشی عدم استحکام کے ذمہ دار چیئرمین پی ٹی آئی ہیں، پی ٹی آئی نے اپنے دورِ حکومت میں پھیلائی معاشی، سماجی اور سفارتی تباہی کا ملبہ موجودہ حکومت پر ڈالنے کی ناکام کوشش کی۔
فرانسیسی صدر کو لکھے گئے خط میں کہا گیا ہے کہ چیئرمین پی ٹی آئی نے سوشل میڈیا کو نوجوان نسل کو گمراہ کرنے کے لیے ہتھیار کے طور پر استعمال کیا۔
خط میں کہا گیا ہے کہ 9 مئی کو ایک سیاسی جماعت کے شر پسندوں نے ریاست کی اساس پر حملہ کیا۔
فرانس میں مقیم پاکستانی سول کمیونٹی اور فرانسیسی عوام کے خط میں مزید کہا گیا ہے کہ شر پسندوں کو احتساب اور قانونی کارروائی سے بچانے کے لیے پی ٹی آئی انسانی حقوق کی خلاف ورزیوں کا بے بنیاد پروپیگنڈا کر رہی ہے۔
صدر میکرون کو لکھے گئے خط میں یہ بھی کہا گیا ہے کہ فرانسیسی حکومت حقائق اور درست معلومات پر مبنی مثبت اور تعمیری تنقید کی حوصلہ افزائی کرتی ہے۔
