اسلام آباد: (دنیا نیوز) الیکشن کمیشن نے خیبرپختونخوا کے متعدد وزراء، معاونین اور مشیروں کو ہٹانے کی ہدایت جاری کر دی۔
سیکرٹری الیکشن کمیشن نے نگران وزیر اعلیٰ خیبرپختونخوا محمد اعظم خان کو خط لکھا ہے جس میں نگران وزراء، مشیران اور معاونین خصوصی کی جانب سے صوبے کے سیاسی امور میں مداخلت کا نوٹس لیتے ہوئے ان کو ہٹانے کی ہدایت کی ہے۔
یہ بھی پڑھیں: مقررہ مدت میں انتخابات کروانے کیلئے تیار ہیں: الیکشن کمیشن
خط کے متن میں کہا گیا ہے کہ الیکشن کمیشن کے نوٹس میں آیا ہے کہ نگران کابینہ سیاسی وابستگیوں کی بنیاد پر تقرر کی گئی، جس کی مثال سابق نگران وزیر شاہد خٹک کا کیس ہے، اس کے علاوہ اور بھی وزرا نے اپنی پارٹی وابستگی تسلیم کی، شاہد خٹک نے عہدے سے استعفیٰ دے دیا ہے۔
خط میں کہا گیا کہ کچھ وزراء، مشیران، معاونین خصوصی سمیت دیگر کا رویہ الیکشن ایکٹ 2017 کے منافی ہے، الیکشن کمیشن درخواست کرتا ہے کہ ایسے وزراء، مشیران اور معاونین خصوصی کو ان کے عہدوں سے ہٹایا جائے تاکہ آنے والے انتخابات کا صاف و شفاف انعقاد یقینی بنایا جا سکے۔
