گجرانوالہ: (دنیا نیوز) مراکش کشتی حادثے میں بچ جانے والا گجرانوالہ کا رہائشی نوجوان عامر علی گھر پہنچ گیا۔
عامر علی نے بتایا کہ وہ 6 ماہ قبل گھر سے سپین جانے کے لیے روانہ ہوا تھا لیکن اس کا سفر انتہائی خطرناک اور تکلیف دہ ثابت ہوا، انہیں لیبیا تک جہاز پر اور پھر آگے ٹیکسیوں کے ذریعے ماریطانیہ اور سینیگال لے جایا گیا وہاں سے انہیں ایک کشتی میں سوار کیا گیا جس میں 40 افراد کی گنجائش کے باوجود 86 افراد کو بٹھایا گیا تھا۔
عامر علی نے بتایا کہ کشتی 13 دن تک سمندر میں رہی اور اس دوران سمگلرز نے مزید پیسے مانگے، ان کے ایجنٹوں نے پیسے ادا نہیں کیے تھے جس کی وجہ سے سمگلرز نے ان پر تشدد شروع کر دیا۔
نوجوان نے بتایا کہ انہیں ہتھوڑیوں سے مارا گیا جس کی وجہ سے وہ شدید زخمی ہو گئے، ان کے پاؤں اب بھی زخمی ہیں اور وہ صحیح طریقے سے چل بھی نہیں پاتے، وہ اس واقعے کا حال بیان نہیں کر سکتے کیونکہ انہیں وہ مناظر یاد کر کے خوف آتا ہے۔
عامر نے مراکش کے باشندوں کا شکریہ ادا کیا جنہوں نے انہیں اور دیگر مسافروں کو بچایا۔
انہوں نے کہا کہ ایجنٹوں کو سخت سزا ملنی چاہیے تاکہ کوئی نوجوان غیرقانونی طریقہ اختیار کرنے کی کوشش نہ کرے، ابھی تک تقریباً 2 ہزار نوجوان سیف ہاؤسز میں موجود ہیں جو آگے جانے کا ارادہ رکھتے ہیں۔
