اسلام آباد: (دنیا نیوز) وفاقی دارالحکومت اور گردونواح میں موسلادھار بارش کے باعث اسلام آباد انٹرنیشنل ایئرپورٹ پر پروازوں کا شیڈول شدید متاثر ہو گیا۔
بارش کے باعث 30 سے زائد پروازیں تاخیر کا شکار ہو گئیں جبکہ پروازوں کی روانگی اور آمد میں کئی گھنٹوں کی تاخیر کا سامنا کرنا پڑ رہا ہے۔
برطانیہ جانے والی برٹش ایئرویز کی پرواز بی کے 2160 تین گھنٹے تاخیر کا شکار ہوئی جبکہ قومی ایئرلائن کی دبئی جانے والی پرواز پی کے 233 کی روانگی میں ایک گھنٹے کی تاخیر ہوئی ہے۔
نجی ایئر لائن کی کراچی جانے والی پرواز نے 1:35 کے بجائے 3:45 پر اڑان بھری جبکہ جدہ جانے والی سعودی ایئرلائن کی پرواز بھی تاخیر کا شکار رہی۔
دبئی جانے والی پرواز ایک گھنٹہ تاخیر سے روانہ ہوئی جبکہ دوحا جانے والی پرواز میں ایک گھنٹے سے زائد تاخیر ہوئی، باکو جانے والی جے 2-144 پرواز 3:44 کے بجائے 4:27 پر روانہ ہوئی جبکہ مسقط جانے والی پرواز چار بجے کی بجائے پانچ بجے روانہ ہوئی۔
سعودی عرب کے شہر ریاض کے لیے پرواز میں بھی ایک گھنٹے سے زائد تاخیر ہوئی جبکہ ابوظہبی جانے والی اور ترکیہ جانے والی پروازیں بھی کئی گھنٹے تاخیر کا شکار ہوئیں۔
صبح پانچ بجے روانہ ہونے والی کویت اور دبئی کی پروازیں تاحال روانہ نہیں ہو سکیں جبکہ پی آئی اے کی دو پروازیں پی کے 741 اور پی کے 451 بھی روانگی کی منتظر ہیں۔
نجی ایئرلائن کی صبح 8 بجے روانہ ہونے والی پرواز ای آر 811 کی روانگی رات 8 بجے متوقع ہے جبکہ صبح 9 بجے دمام جانے والی پرواز اب دوپہر 3 بجے روانہ ہوگی۔
ایئرلائن حکام نے مسافروں سے اپیل کی ہے کہ وہ بارش کے باعث پیدا ہونے والی صورتحال کے پیش نظر ایئرپورٹ بروقت پہنچیں اور روانگی سے قبل فلائٹ انکوائری نمبر یا متعلقہ ایئرلائن کی ہیلپ لائن سے رابطہ ضرور کریں تاکہ پریشانی سے بچا جا سکے۔
